Փոլ Կարմիրյանը ընդգրկվել է ամերիկյան «Պարիր, թե կարող ես» հեռուստանախագծի լավագույն քսանյակի մեջ, hայտնում է «Գլենդեյլ նյուզ փրես» թերթը:
Լավագույն քսանյակը «Ֆոքս» հեռուստաընկերությամբ ցուցադրվող հեռուստածրագրի եզրափակիչ փուլն է:
«Ես ցնցված եմ: Կարծես իրական չլինի այս ամենը», – ասել է Կարմիրյանը, – «Ես շատ ուրախ եմ, որ այստեղ եմ»:
Երկու տարի առաջ Փոլը հաղթել է նույն նախագծի հայկական տարբերակում:
Համեմատելով հայկական և ամերիկյան նախագծերը՝ նա նշում է, որ դրանք բավական տարբեր են, դրա պատճառներից մեկը համարելով այն, որ Հայաստանը շատ ավելի փոքր է Ամերիկայից. «Սակայն Հայաստանում նախագծին մասնակցելը ինձ շատ բան է սովորեցրել… ու օգնել, որ ավելի լավ պարող դառնամ»:
Կարմիրյանը 6 տարեկանում է իր ծնողների հետ Հայաստանից մեկնել Գլենդեյլ: Այդ ժամանակ նա ծանոթ էր միայն հայկական ազգային պարերին. «Ոչ մի լուրջ բան», – ասում է նա:
17 տարեկանում նա նոր սկսել է լատինական պարեր սովորել, ինչն այս մրցույթում լուրջ թերություն է, քանի որ նա մրցում է մարդկանց հետ, որոնք շատ ավելի երկար տարիների փորձ ունեն:
«Ես գիտեի, որ մրցելու եմ մարդկանց հետ, որոնք իրենց ամբողջ կյանքում պարում են: Ես գիտեի ինչ ծանր աշխատանք է ինձ սպասվում», – ասում է նա՝ ավելացնելով, որ նա բառացիորեն առավոտից մինչև գիշեր պարապում է:
Պատրաստեց Հովհաննես ԻՇԽԱՆՅԱՆԸ
