ԱՄՆ-ի պետդեպի զեկույցում թրաֆիքինգի դեմ պայքարի առումով 180 երկրների շարքում Հայաստանը հայտնվել է 30-ի խմբում, ինչը նշանակում է, որ երկիրը կարեւորում է թրաֆիքինգի դեմ պայքարը, կառավարությունը լրջորեն ծրագրեր է իրականացնում այս ուղղությամբ ու երկրում այս առումով ամեն ինչ կատարյալ է: Aravot.am-ի հետ զրույցում Մարդու իրավունքների նախկին պաշտպան, «Ընդդեմ իրավական կամայականության» ՀԿ նախագահ Լարիսա Ալավերդյանն ասաց, որ այս առիթով պետք չէ ոգեւորվել:
«Այժմ ես թվերին չեմ տիրապետում, բայց անհանգստություն ունեմ այդ հարցով: Ես դրանով զբաղվել եմ մի քանի տարի առաջ եւ իմ համոզմունքն է եղել, որ Հայաստանում թրաֆիքինգ չէր լինի, եթե չքողարկվեր այն ժամանակ իրավապահ մարմինների կողմից: Հայաստանին շատ դժվար է պատկերացնել որպես մի քանի ելքեր ունեցող երկիր: Ես չէի պատկերացնում, որ դա կարելի է անել առանց հանցավոր համագործակցության, բայց թե հիմա պայքարի ձեւերն ու միջոցներն ինչպիսին են եղել`ես չգիտեմ: Այն ժամանակ ես ունեի ձեւավորված կարծիք, առ այն, որ մեր դատական իշխանությունը պատշաճ ձեւով չի աշխատում թե թրաֆիքինգից տուժածների հետ, թե մեղավորների, մեղադրյալների հետ: Ոգեւորվել այդ զեկույցով`ընդհանրապես պետք չէ, քանի որ խոսքը գնում է պայքարի մասին, ոչ թե երեւույթի մասին: Եթե մենք ցույց ենք տվել, որ օրենսդրություն ենք փոփոխել, կամ`պատժելիության սկզբունքն է գործել մի քիչ ավելի շատ, դրանք փաստեր են, որոնք խոսում են ոչ թե այն մասին, որ թրաֆիքինգը չկա, այլ այն մասին, որ դրա դեմ պայքարում ենք»:
Եվա ՀԱԿՈԲՅԱՆ
Կարդացեք նաև
