Հայաստանն այնպիսի խաղացող չէ, որ կարողանա տարածաշրջանում արմատական կեցվածք դրսեւորել, որի համար Ռուսաստանը գազի գործոնը որպես Հայաստանին ճնշելու միջոց օգտագործի: Aravot.am-ի հետ զրույցում նման կարծիք հայտնեց ԱԺ ՀՅԴ խմբակցության պատգամավոր Արծվիկ Մինասյանը, պատասխանելով մեր այն հարցին, թե «Հայռուսգազարդի» հայկական 20% բաժնեմասը «Գազպրոմին» վաճառելով եւ դառնալով 100%-անոց սեփականատեր, արդյոք որոշակի թե տնտեսական, թե քաղաքական ճնշումների չենք ենթարկվի:
Պարոն Մինասյանի խոսքերով՝ Հայաստանի արտաքին անվտանգության կախվածությունը Ռուսաստանից այնքան մեծ է, որ գազի գործոնը չեն օգտագործի. «20% բաժնեմասը վաճառելու գործարքը տնտեսական շահույթ հետապնդող նախագիծ է, որն անշուշտ ունի քաղաքական հետեւանք: Մասնավորապես, երբ Հայաստանի սոցիալ-տնտեսական վատթարացման պատճառով դատարկվում է Հայաստանը, դրա արդյունքում վտանգվում է Հայաստանի անվտանգության աստիճանը: Մեր իշխանությանը մեղադրում եմ նրանում, որ չեն կարողանում ռազմավարական գործընկերությունը հավուր պատշաճի ներկայացնել»:
Ըստ Արծվիկ Մինասյանի, Հայաստանը առավելագույնս քայլեր պետք է ձեռնարկի իրանական գազի մուտքը մեր երկիր մեծացնելու ուղղությամբ, դա, փաստորեն, ռուսական կողմից գազային կախվածությունից կփրկի:
Պարոն Մինասյանի խոսքերով`«Իրան-Հայաստան գազամուղը թույլ է տալիս մինչեւ 2026 թվականը ներմուծվող գազի ծավալները հասցնել 2,2 միլիարդ խորանարդ մետրի, ինչն ամբողջությամբ բավարար է Հայաստանի ներքին պահանջարկին, սակայն, առ այսօր նախատեսվածից մի քանի անգամ ավելի քիչ իրանական գազ ենք ներմուծում, եւ անհասկանալի է`թե ինչու»:
Կարդացեք նաև
Մի քանի անգամ պակաս գազ ներմուծելու անհասկանալիությունն էլ, պարոն Մինասյանը հիմանվորեց այն հանգամանքով, որ երկու կողմերի պայմանագրային պահանջներն այլ բան են ցույց տալիս, բայց իրականում այլ բան է կատարվում. «Անհասկանալի եմ ասում, որովեհետեւ պայմանագրերը, որ կնքված է Իրանի գազ արտահանող ընկերության եւ Երեւանի ՋԷԿ-ի միջեւ, թույլ է տալիս մինչեւ 2010 թվականը 1,1 միլիարդ խմ գազ ներմուծել, 2010-12 թվականին`1,5 միլիարդ ու այդպես շարունակ մինչեւ կհասցնեին 2,2-ի: Բայց ինչպես հրապարակումներն են ցույց տալիս, առնվազն 3 անգամ նվազ գազ ենք ներմուծում: Անհասկանալի է, թե ինչո՞ւ, այն դեպքում, երբ իրանական գազը վերածված է էլեկտրաէներգիայի եւ փոխանակման գործակիցը թույլ է տալիս մեզ պնդել, որ իրանական գազը արժենում է ավելի էժան`70 դրամ`1 խորանարդ մետրի դիմաց»:
Նելլի ԲԱԲԱՅԱՆ
