ԲՀԿ խմբակցության պատգամավոր Վահան Կարապետյանը կարծում է, որ 45 հազար դրամը «շատ քիչ ա», որպեսզի միջին վիճակագրական հայաստանցին կարողանա իր մեկ ամսվա ծախսերը հոգալ:
Հիշեցնենք, որ հուլիսի մեկից Հայաստանում նվազագույն աշխատավարձը դառնալու է 45 հազար դրամ: Սա թեեւ Տիգրան Սարգսյանի վերանշանակումից հետո մեր հին ու նոր կառավարության գալիք տարվա ծրագրում էր ամրագրված, բայց երբ հաստատվեց գազի գնի թանկացումը, կառավարությունը որոշեց քայլեր անել: Նվազագույն աշխատավարձի 10 հազար դրամով բարձրացումն այն քայլերից մեկն է, որ կառավարությունն անում է՝ մեղմելու համար վերահաս թանկացումները: Հիշեցնենք, որ նախորդ օրերին խորհրդարանում տնտեսագետ-պատգամավորները հիմնավորեցին, որ այս քայլը ոչ քաղաքական, ոչ տնտեսական եւ ոչ էլ թանկացումները մեղմելու իմաստով որեւէ ազդեցություն չի գործում: Ավելին, տնտեսական իմաստով, այն անգամ բացասական գնահատեցին:
Aravot.am-ը պարոն Կարապետյանից հետաքրքրվեց՝ որքա՞ն է իր ընտանիքի մեկ ամսվա նվազագույն ծախսը՝ պատկերացնելու համար, թե որքան գումար է անհրաժեշտ ոչ պատգամավորական ընտանիքներին: «Ճիշտն ասած, չեմ հաշվել, բայց հաստատ 45 հազար դրամ չի»,- ասաց պատգամավորը:
Հարցին՝ 45 հազար դրամը քանի՞ օր կբավարարի իրեն, պարոն Կարապետյանն արդեն հեռանալով ասաց. «Չգիտեմ: Չեմ հաշվել»:
Կարդացեք նաև
Նելլի ԳՐԻԳՈՐՅԱՆ
