«Ռուսաստանը աջակցում է Ադրբեջանի ռազմական պատրաստվածությանը: Ադրբեջանը նախապատրաստվում է պատերազմի: Եվ պատրաստվում է պատերազմ սկսել այն ժամանակ, երբ Հայաստանը արտագաղթի հետեւանքով կգտնվի ամենաթույլ վիճակում, իսկ այդ վիճակին Հայաստանը կհասնի 2-3 տարում»,- Aravot.am-ին ասաց քաղաքագետ Անդրիաս Ղուկասյանը` անդրադառնալով նախօրեին Ռուսաստանի կողմից հրապարակված 2012-ին Ադրբեջանին վաճառված զենքի եւ ռազմական տեխնիկայի ցանկին:
Հիշեցնենք, որ ըստ ՄԱԿ-ի սովորական սպառազինության Ռեգիստրին Ռուսաստանի կողմից ներկայացված 2012 թվականի զեկույցի, 2012-ին Ռուսաստանը Ադրբեջանին է վաճառել ուղղաթիռներ, հրետանի եւ հակաօդային պաշտպանության համակարգեր, ներկայացրել է 8 հարվածային ուղղաթիռ եւ խոշոր տրամաչափի 18 հրետանային համակարգ: Բացի այդ« Ադրբեջանին է վաճառվել հրթիռներ արձակող 200 սարք եւ կից 1000 հրթիռ:
Պարոն Ղուկասյանի խոսքերով, 2-3 տարի հետո Ադրբեջանն ունենալու է անհրաժեշտ սպառազինությունը. «Որ ռազմական ճանապարհով փորձի այս տարածաշրջանում առաջացնել ռազմական խիստ լարվածություն: Այն, որ զենքի մատակարարումը Ադրբեջանին դարձնում է ամենազինված երկիրը Հարավային Կովկասում: Ռուսաստանն իր քայլերով նպաստում է այդ պատերազմին»:
Քաղաքագետի խոսքերով, Ռուսաստանը Հայաստանի համար բարեկամ երկիր չէ եւ առհասարակ ռազմավարական ոլորտում դաշնակից չէ. «Հայաստանը Ռուսաստանի լծի տակ գտնվող երկիր է, որտեղ քրեաօլիգարխիկ համակարգը օգտագործում է պատերազմային վիճակը Հայաստանում իր` այստեղ իշխանությունը վերարտադրելու համար: 2-3 տարի հետո Ադրբեջանը Հայաստանից առնվազն ավելի լավ պատրաստված է լինելու պատերազմի համար»:
Կարդացեք նաև
Արփինե ՍԻՄՈՆՅԱՆ
