ԵՊՀ ընդունող հանձնաժողովի պատասխանատու քարտուղար Վաչագան Գալստյանը, ԵՊԲՀ ընդունող հանձնաժողովի պատասխանատու քարտուղար Կոստանտին Մանուկյանի և Խորենացու անվան համալսարանի ռեկտոր Արթուր Աղաբայանն այսօր «Զարկերակ» ակումբում խոսեցին ընդունելության քննություններից, նաեւ նշեցին, թե որ ֆակուլտետներն են առավել պահանջված և ի՞նչ խնդիրներ ունեն մասնավոր բուհերը:
Վաչագան Գալստյանը նշեց, որ կապված հանրապետությունում դիմորդների թվի նվազման հետ՝ անցյալ տարվա 16870-ի փոխարեն, այս տարի ԵՊՀ դիմել է 12747 դիմորդ: Ընդ որում ԵՊՀ-ն ունի 338 անվճար, 2800 վճարովի տեղեր:
ԵՊՀ ընդունող հանձնաժողովի պատասխանատու քարտուղարի ձեւակերպմամբ, սոցիալ-տնտեսական մասնագիտությունների գծով վիճակը թույլ է, դիմորդների թիվը նվազ է բնագիտական առարկաների գծով, որտեղ կլինեն թափուր տեղեր: Ինչ վերաբերում է լրագրության, սոցիոլոգիայի, կառավարման ֆակուլտետներին, դիմորդներն ավելի շատ են:
Արթուր Աղաբայանը եւս փաստեց, որ որոշակի մասնագիտություների գծով իրենց բուհում եւս կլինեն թափուր տեղեր, մյուս փուլում Սփյուռքի ուսանողների համար լրացուցիչ ընդունելություն կկատարվի, մինչեւ օգոստոսի 20-ը կարող են դիմել:
Կարդացեք նաև
ԵՊԲՀ ընդունող հանձանաժողովի պատասխանատու քարտուղար Կոստանտին Մանուկյանի ասելով, բժշկական համալսարանի դիմորդների թիվը չի փոխվել, նախորդ տարվա համեմատ իրենց բուհում դիմորդների թիվը 80-ով է պակասել: «Եթե ժողովրդի մոտ թյուր կարծիք կա, թե նվազագույնի շեմը հաղթահարածները կարող են հեշտ ընդունվել մեր բուհ, դա այդպես չէ»,-շեշտեց Կոնստանտին Մանուկյանը:
Aravot.am-ը խնդրեց մեկնաբանել մինչեւ ՄԻՊ եւ ՍԴ հասած բուհերի ինքնավարության սահմանների վիճարկման եւ ԳԹԿ-ի կողմից անցկացվող միասնական քննությունների հարցը:
«Ի՞նչ կապ ունի ինքնավարությունը քննությունների կազմակերպման հետ»,-զարմացավ պարոն Աղաբաբյանը:
Մյուս ռեկտորները տարակուսած էին եւ տեղյակ չէին, որ մի շարք ռեկտորներ դիմել են Մարդու իրավունքների պաշտպանին, վերջինս էլ՝ ՍԴ բուհերի ինքնավարության սահմանները հստակեցնելու նպատակով:
ՄԻՊ գրասենյակը հայտարարություն էր տարածել, թե գրեթե չորս տարի է, ինչ ՀՀ կառավարության որոշմամբ ընդունելության քննությունները կազմակերպվում եւ անցկացվում են բացառապես ԳԹԿ-ի կողմից, մինչդեռ ՀՀ Սահմանադրությամբ երաշխավորվում են ԲՈՒՀ-երի ինքնավարության սկզբունքները, իսկ «Բարձրագույն և հետբուհական մասնագիտական կրթության մասին» ՀՀ օրենքով՝ ըստ կրթական ծրագրերի դիմորդների ընդունելության և ուսումնական գործընթացի կազմակերպումը հանդիսանում է բարձրագույն ուսումնական հաստատության իրավասությունը:
Ասուլիսի ժամանակ, ռեկտորները, խոսելով հաշմանդամ դիմորդների ու ուսանողների մասին, փաստեցին, որ իրենց բուհերում իրավիճակը նույնն է, ինչ ողջ երկրում, այսինքն հաշմանդամների համար թեքահարթակներ եւ այլ պայմաններ չկան: Պարոն Աղաբաբյանն էլ հավելեց, որ այս տարի տեսողական խնդիր ունեցող իրենց մի ուսանող արդեն ավարտել է բուհը, նրա համար դասախոսությունները ձայնագրվել են:
Ըստ Վաչագան Գալստյանի, ԵՊՀ-ում արտոնյալ դիմորդների թիվը, որոնց մեջ նաեւ հաշմանդամություն ունեցողներն են, ամեն տարի շուրջ 50 հոգի է կազմում:
Գոհար ՀԱԿՈԲՅԱՆ
