Օրեր առաջ հայտնի դարձավ, որ ՀՀ ռազմաուսումնական հաստատություններում սովորելու իրավունք ու հնարավորության է ընձեռվել նաեւ աղջիկներին։
ՀՀ Պաշտպանության նախարարությունը հայտարարել էր իգական սեռի ներկայացուցիչների ընդունելություն՝ Վ. Սարգսյանի անվան ռազմական եւ մարշալ Ա. Խանփերյանցի անվան ռազմական ավիացիոն ինստիտուտներում։ «Ընդունելությանը կարող են մասնակցել ՀՀ քաղաքացի հանդիսացող, 18 տարին լրացած, ֆիզիկապես կոփված, «մաթեմատիկա» եւ «ֆիզիկա» առարկաներից միասնական քննության վկայագիր ներկայացնող իգական սեռի ներկայացուցիչները, որոնց առողջական վիճակը բավարար կճանաչվի ռազմաուսումնական հաստատությունում սովորելու եւ հետագա զինվորական ծառայություն անցնելու համար»,- մասնավորապես ասված էր հայտարարության մեջ։ Դիմորդների փաստաթղթերը պետք է ընդունվեն մինչեւ սույն թվականի հուլիսի 1-ը։
…ՊՆ մամլո խոսնակ Արծրուն Հովհաննիսյանից երեկ հետաքրքրվեցինք, թե վերը նշված ընդունելության վերաբերյալ հայտարարությանն ինչպե՞ս են արձագանքել աղջիկները, հայտեր ներկայացվե՞լ են։ «Մենք այդ տվյալները կամփոփենք հուլիսի 1-2-ին։ Այս պահի դրությամբ չենք կարող ասել՝ կա՞ն դիմորդներ, քանի՞ հոգի են։ Այդ տեղեկատվությունը սփռված է զինվորական կոմիսարիատներում։ Երբ որ մենք հուլիսի 1-2-ին հավաքենք եւ ամփոփենք, նոր կարող ենք որոշակի պատկեր տալ»,- ասաց նա։ Ըստ ՊՆ խոսնակի, իրենց հայտարարությունն աղջիկների շրջանում հետաքրքրություն առաջացրել է։ «Մենք դա տեսել ենք տարբեր դրսեւորումներով՝ ստացված զանգերով, դիմումներով»,- մանրամասնեց նա։ Ավելին, նշեց, որ որոշ մասնագիտությունների գծով նույնիսկ մրցակցություն է ակնկալվում։
Ինչ վերաբերում է հարցին, թե ռազմաուսումնական հաստատություններում աղջիկների ընդունելությունը կարո՞ղ է առաջին քայլը լինել՝ նրանց համար եւս ժամկետային զինծառայությունը պարտադիր դարձնելու ուղղությամբ, Արծրուն Հովհաննիսյանը պատասխանեց. «Դժվար թե նման բան լինի»։ Հետո ավելացրեց. «Այս քայլը ոչ թե աղջիկների համար ծառայությունը պարտադիր դառնալու նախապայման է, այլ աղջիկներին շանս տալու, իրավունքները հավասարեցնելու նախապայման։ Փառք Աստծո, Հայաստանում տղաները անհրաժեշտ քանակով կան ծառայության համար»։
Կարդացեք նաև
Աննա ԶԱԽԱՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
