Երեւանի մետրոպոլիտենի վերականգնման ծրագրի 2-րդ փուլի համար 5 միլիոն եվրո վարկ կտրամադրվի Եվրոպական ներդրումային բանկի կողմից: Այս մասին տեղեկացնում է ՀՀ կառավարության կայքէջը: Վաղը կառավարության նիստում հավանություն կտրվի ՀՀ-ի եւ Եվրոպական ներդրումային բանկի միջեւ 2013 թվականի մայիսի 2-ին Երեւանում եւ մայիսի 10-ին Լյուքսեմբուրգում ստորագրված «Երեւանի մետրոպոլիտենի վերակառուցում-2-րդ փուլ» ֆինանսական պայմանագրին:
«Ծրագրի նպատակն է նվազեցնել ջրի ներհոսքը մետրոյի թունելներ: Տվյալ ներդրումները Հայաստանի մայրաքաղաքում հանրային տրանսպորտի մատուցած ծառայությունների բարելավմանն ուղղված ու հանրային տրանսպորտի բարեփոխման միջոցառումների մասն են կազմում: Ծրագիրը հիմնականում նպատակամղված է օգնելու ցածր եկամուտ ունեցող սոցիալական խմբերին, որոնք ներկայումս օգտվում են մետրոյի համակարգից»,-նշված է կառավարության ներկայացված փաստաթղթում:
Բացի այդ, ըստ ծրագրի, նախատեսվում է գործող դրենաժային թունելների վերակառուցում եւ ընդլայնում, նախատեսվում է գործող դրենաժային թունելը երկարացնել, հասցնել մինչեւ Հանրապետության հրապարակ, որը կապահովի ամբողջ տարածքի համար ստորգետնյա ջրերի մակարդակի իջեցում եւ զգալիորեն կբարելավի թունելների շահագործման պայմանները: Ծրագրով նախատեսվում է նաեւ մետրոյի թունելների վերակառուցում`ներառյալ գրունտավորում եւ հակակոռոզիական մշակում, ինչպես նաեւ կայարանների եւ ծառայողական շինությունների բարելավում, մետրոյի վագոնների վերանորոգում, արդիականացում եւ 7 կամ 8 վագոնների ավելացում:
Ըստ ֆինանսների նախարարության ներկայացրած փաստաթղթի, ծրագիրը կավարտվի մինչեւ 2015-ի դեկտեմբերի 31-ը:
Կարդացեք նաև
Կառավարություն ներկայացրած նախագծի հավելվածում նշված է, որ ծրագրի ներդրումների նախնական ընդհանուր արժեքը` ըստ Բանկի գնահատումների, կազմել է 30 միլիոն եվրո, իսկ ամբողջական ներդրումային արժեքը` ներառյալ չնախատեսված տեխնիկական ծախսեր, գնաճ եւ վերակառուցման ընթացքում առաջացած տոկոսներ` 34 միլիոն 600 հազար եվրո:
Նույն հավելվածում գրված է.«Ծրագրի առաջին փուլը ֆինանսավորվել է Բանկի, ՎԶԵԲ-ի եւ Հարեւանության Ներդրումային Ծրագրի միջոցով, եւ այդ նպատակով Բանկը 2010թ․ օգոստոսի 10-ին Վարկառուի եւ Բանկի միջեւ կնքված ֆինանսական պայմանագրով /փոփոխվել է 2012թ. Մարտի 12/2012թ. Մայիսի 10/ Վարկառուին տրամադրել է 5,000,000 եվրո (հինգ միլիոն եվրո) գումարի չափով վարկ, (այսուհետ՝ Նախկին Ֆինանսական Պայմանագիր):
Ծրագրի երկրորդ փուլը, ինչպես մասնավորապես նկարագրված է Տեխնիկական Նկարագրության մեջ, (Փուլ II) Բանկի կողմից գնահատվել է 15, 000, 000 եվրո (տասնհինգ միլիոն եվրո), ուստի Վարկառուի հաղորդմամբ նա մտադիր է ֆինանսավորել Փուլ II-ը հետեւյալ կերպ`
| Աղբյուր | Գումար (միլիոն եվրո) |
| Վարկ ՎԶԵԲ-ից | 5 |
| Վարկ Բանկից | 5 |
| ՀՆԾ դրամաշնորհներ | 5 |
| Ընդամենը Փուլ II-ի համար | 15 |
Նելլի ԲԱԲԱՅԱՆ
