Ֆուտբոլային մեկնաբան, «Ֆուտբոլ Պլյուս» շաբաթաթերթի հիմնադիր Սուրեն Բաղդասարյանն այսօր «Ֆորում» մամուլի ակումբում խոսեց Հայաստանի ազգային հավաքականի` Մալթայից կրած խայտառակ պարտության եւ Դանիայի նկատմամբ տարած փառահեղ հաղթանակի` իր պատկերացրած պատճառների, ընդհանրապես մեր հավաքական թիմի, գլխավոր մարզիչ Վարդան Մինասյանի եւ ՀՖՖ նախագահ Ռուբեն Հայրապետյանի հրաժարականների մասին:
«Ինձ թվում է` մեր ազգին հատուկ է ծայրահեղական լինելը: Մենք միջինը չենք ընդունում. կամ լավ, կամ վատ: Մեր ֆուտբոլիստները, պարզապես, Մալթային արհամարհել էին: Իհարկե, մարտավարական առումով եղան նաեւ տակտիկական սխալներ: Բայց կարծում եմ` պարտության գլխավոր պատճառն այն էր, որ ֆուտբոլիստները մտածել էին, թե ինչպես էլ լինի, Մալթային կհաղթեն: Սակայն այսօր Եվրոպայում թույլ թիմեր չկան, համենայնդեպս, պաշտպանվել գիտեն: Եթե լավ հարձակվողներ չունեն, չեն կարողանում դաշտում գերիշխել, ամբողջ թիմով շարվում են ու գրագետ պաշտպանվում: Մալթան էլ այդ կարգի թիմ լինելով` մեր հավաքականին տակտիկապես գերազանցեց:
Շատ է խոսվում կազմի մասին: Իհարկե, կազմն էլ սխալ էր ընտրվել: Բայց շատ հեշտ է ետին թվով նման եզրակացություններ անել: Մարզիչը, գուցե, իրավունք ուներ գոնե Մալթայի նման թիմի հետ մեկ-երկու փորձարկում անել: Մենք առանց այն էլ պահեստայինների շատ կարճ նստարան ունենք: Եվ եթե այդպիսի խաղերում ֆուտբոլիստներ չպետք է փորձարկվեն, ապա` էլ ե՞րբ, որպեսզի, եթե մեկը որակազրկվում կամ վնասվածք է ունենում, արժանի փոխարինող լինի:
Մալթային պարտվելն, իհարկե, խայտառակություն էր եւ ճիշտ է ժողովրդի դժգոհությունը: Բայց մյուս կողմից էլ` Դանիայի հետ խաղն ապացուցեց, որ մեր հավաքականը կարող է խաղալ, չի մոռացել այն խաղը, որ ցուցադրում էր նախորդ շրջափուլում», – ասաց բանախոսը:
Կարդացեք նաև
Աշոտ ՀԱԿՈԲՅԱՆ
