Ավան եւ Նոր Նորք վարչական շրջանների ընդհանուր իրավասության դատարանում այսօր շարունակվեց «Հարսնաքար» ռեստորանային համալիրի աշխատակիցներ Գարիկ Մարգարյանի, Նորայր Հայրապետյանի, Դավիթ Ադամյանի, Արթուր Բաբլոյանի, Արման Խաչատրյանի եւ Արման Բաղդասարյանի դեմ հարուցված քրեական գործով դատական հերթական նիստը: Ուղիղ մեկ տարի առաջ «Հարսնաքար» ռեստորանային համալիրի աշխատակիցների բռնությունների հետեւանքով ռազմական բժիշկ Վահե Ավետյանի կյանքն ընդհատվեց:
Դատարանը բավարարել էր տուժողների ներկայացուցիչ Տիգրան Եգորյանի միջնորդությունը, եւ հրավիրվել էին լրացուցիչ վկաներ:
Վկաներից չորսը «կանչովի» մատուցողներ էին, որոնք հրավիրվել էին դեպքի օրը առանձին սեղաններ սպասարկելու, իսկ երկուսը` ֆուտբոլի ակադեմիայի տնօրենն ու փոխտնօրենն էին:
Կարդացեք նաև
Տիգրան Եգորյանը մատուցողներին տալիս էր գրեթե նույն հարցերը.ո՞վ է կանչել այդ օրը սպասարկելու, հրավառություն եղե՞լ է ռեստորանային համալիրում, տարօրինակ բան տեսե՞լ են հարակից սեղանների հաճախորդների հետ կապված, անվտանգության աշխատակիցներին ճանաչո՞ւմ են, թե`ոչ, ումից են իմացել դեպքի մասին, երբ, Ռուբեն Հայրապետյանին տեսե՞լ են ռեստորանային համալիրում, թե ոչ:
«Կանչովի» մատուցողներն էլ պատասխանում էին նույն կերպ. հրավառություն չեն տեսել, սպասարկել են առանձին սեղաններ, Ռուբեն Հայրապետյանին չեն տեսել, բացի մատուցող Դավիթ Ադամյանից, որեւէ մեկին չեն ճանաչում, իրենց հրավիրել է «Պաշը»` Պավել Հարությունյանը:
Ի դեպ, մի վկայի հետ կապված`Բագրատ Հարությունյանի, տուժողների ներկայացուցիչը այլ վկայի հարցրեց նրա գտնվելու վայրը: Պարզվեց, վկան ոչ միայն անցյալ տարվա սեպտեմբերից Հայաստանում է, այլ` նաեւ դատարանում:
Այդ վկան` Բագրատ Հարությունյանը դեպքից մի քանի օր հետո մեկնել է Ռուսաստան, երեք ամիս հետո վերադարձել: Տուժողի ներկայացուցչին, որն ի դեպ, միայնակ էր, քանի որ Վահեի չորս ընկերները, տուժողի իրավահաջորդի ներկայացուցիչ Վահե Գրիգորյանն ու մյուս ներկայացուցիչը` Լուսինե Հակոբյանը բացակայում էին այսօրվա նիստից, հետաքրքրեց մի հարց. ինչն է ստիպել, որ նա դեպքից մի քանի օր անց հեռանա: Աշխատանքը, պատասխանեց վկան:
Սակայն այս վկայի ցուցմունքն էլ էական ոչինչ չտվեց տուժողի իրավահաջորդին, քանի որ որոշ հարցադրումներ կրկնվում էին, հաճախ առարկվում ամբաստանյալների պաշտպանների կողմից:
Պետք է նկատել, որ նախագահողը եւ ոչ մի վկայի չհարցրեց, թե արդյոք նրանք ուզում են փաստաբանի ներկայությամբ հարցաքննվեն: Փաստաբանի դերը տվյալ դեպքում ստանձնել էր պաշտպանական կողմը:
Դատարան ներկայացած ֆուտբոլի ակադեմիայի տնօրեն Արթուր Մանուկյանը, եւ տեղակալը`Հարություն Հարությունյանը որեւէ էական հանգամանք չասին դեպքի մասին: Նրանք հայտնեցին, որ գտնվել են ակադեմիայում, նայել են ֆուտբոլ, մինչ ուշ գիշեր, երեկոյան եկել է ֆուտբոլի ֆեդերացիայի նախագահ Ռուբեն Հայրապետյանը, նա էլ իր սենյակում է նայել ֆուտբոլ:
Բացառությունը թերեւս այն էր, որ տեղակալի եւ ամբաստանյալ Գարիկ Մարգարյանի միջեւ վայրկյանների տեւողությամբ տասնմեկանց կեսի սահմաններում հեռախոսազանգ է եղել, ինչը Հարություն Հարությույնաը բացատրեց այսպես.հարցրել է ֆուտբոլը սկսվել է, թե ոչ: Սակայն դա արժանահավատ չընդունվեց տուժողի ներկայացուցչի կողմից:
Ռուզան ՄԻՆԱՍՅԱՆ
