«Երկրապահ բառի տակ կարելի է օգտագործել տարբեր տերմիններ, և չարժե երկրապահ հասկացության մեջ ձևակերպել, որ այն արժեհամակարգ է, կարծում եմ տեղին չէ»-այսօր խորհրդարանում «Երկրապահ կամավորականների կարգավիճակի մասին» օրենքի նախագծի քննարկումների ժամանակ դիմելով համահեղինակ, ԱԺ ՀՀԿ պատգամավոր Սամվել Ֆարմանյանին՝ հարց ուղղեց ԱԺ ՀՅԴ խմբակցության պատգամավոր Աղվան Վարդանյանը: Հիշեցնենք, որ այսօր խորհրդարանում սկսել են քննարկել ԵԿՄ վարչության նախագահ, գեներալ Մանվել Գրիգորյանի հեղինակած «Երկրապահ կամավորականների կարգավիճակի մասին» օրենքի նախագիծը: Համահեղինակներից է նաեւ ԱԺ մյուս գեներալ-պատգամավորը`Սեյրան Սարոյանը:
Աղվան Վարդանյանը նշեց, որ գործող օրենքում 90-94 թվականների մասին է խոսքը`«87-ին մարտական գործողություններ չեն եղել»: Դահլիճից Մանվել Գրիգորյանը անհամաձայնություն հայտնեց Աղվան Վարդանյանի դիտարկումներին: «Պարոն Գրիգորյան Ձեր չափ ես էլ եմ հիշում այդ ժամանակները»,- հակադարձեց դաշնակցական պատգամավորը: Նա հետաքրքրվեց նաև , թե ի՞նչ է լինելու օրենքի ընդունման արդյունքում. «Կարգավիճա՞կ է ստեղծվելու, երկու զուգահեռ ցուցակնե՞ր ենք ունենալու, որտեղ լինելու են մասնակիցները, իսկ մյուսում՝ երկրապահ կամավորականները: Պարոն Գրիգորյանն էլ ու մենք բոլորս գիտենք, որ ունենք տասնյակ մարդիկ, որոնք Հրազդանի ձորում կանգնել, կամուֆլյաժով նկարվել են և այսօր համարվում են կամավորներ կամ ազատամարտիկներ»,- ասաց Աղվան Վարդանյանը, հավանաբար ակնարկելով ԲՀԿ խմբակցության պատգամավոր Ռուբեն Գեւորգյանին`Ծաղիկ Ռուբո:
Ի պատասխան ՀՀԿ-ական պատգամավոր Սամվել Ֆարմանյանը նշեց, որ օրենքի տրամաբանությունը հուշում է, որ հանձնաժողովը աշխատի թափանցիկության պայմաններում և չլինի մի կամավորական կամ ազատամարտիկ, որը օրենքով համապատասխանում է, սակայն չի ստանում այդ կարգավիճակը և չլինի այնպես, որ օրենքի հիմքերին չհամապատասխանող մարդը ստանա կարգավիճակը. «Կարևոր է, որ մենք մեզանից կախված ամեն ինչ անենք, որ այս հաշվառումը և հատուկ կարգի տրամադրումը լինի թափանցիկ և երկրապահ կամավորականների ճշգրիտ քանակ տա»:
Օրենքի նախագիծը, Ֆարմանյանի խոսքերով, զուտ բարոյական հարթությունում է:
Կարդացեք նաև
Նելլի ԳՐԻԳՈՐՅԱՆ
Առաջարկում եմ, որ բարոյական բառը Աժ-ում ընդհանրապես չօգտագործվի: