Ավարտվել է իշխանության ներկայացուցիչների կյանքի կամ առողջության համար ոչ վտանգավոր բռնություն գործադրելու վերաբերյալ քրգործի նախաքննությունը
Իշխանության ներկայացուցիչների՝ ՀՀ ոստիկանության Արարատի մարզային վարչության Արտաշատի բաժնի օպերատիվ-հերթապահ խմբում ընդգրկված ծառայողներ՝ անչափահասների գործերով բաժանմունքի տեսուչ, ոստիկանության լեյտենանտ Ավետ Շահենյանի, պրոֆիլակտիկայի բաժանմունքի տեղամասային տեսուչ, ոստիկանության ավագ լեյտենանտ Արայիկ Հակոբյանի, պարեկա-պահակային ծառայության դասակի ոստիկան, կրտսեր սերժանտ Կամո Ալեքսանյանի և հերթապահ մասի վարորդ, ավագ սերժանտ Վիկտոր Եփրեմյանի օրինական պահանջներին չենթարկվելու, նրանց ծառայողական պարտականությունները կատարելու հետ կապված՝ վերջիններիս կյանքի կամ առողջության համար ոչ վտանգավոր բռնություն գործադրելու դեպքի առթիվ ՀՀ հատուկ քննչական ծառայության վարույթում քննված քրեական գործով նախաքննությունն ավարտվել է։
Քրեական գործը, ըստ մեղադրանքի Գրիգոր Ցոլակի Նազարյանի, Կարապետ Ցոլակի Նազարյանի և Ալիկ Պարույրի Նազարյանի՝ ՀՀ քրեական օրենսգրքի 316-րդ հոդվածի 1-ին մասով, 2013թ. հունիսի 14-ին մեղադրական եզրակացությամբ ուղարկվել է ՀՀ գլխավոր դատախազություն՝ մեղադրական եզրակացությունը հաստատելու և Արարատի մարզի ընդհանուր իրավասության դատարան ուղարկելու համար:
ՀՀ հատուկ քննչական ծառայության մամուլի հաղորդագրություն
