«Հայրիկյանի դեմ կատարվածի մասին իմացել եմ հեռուստատեսությամբ: Իմ պարտքը համարեցի գնալ հիվանդանոց:Նախասրահը լիքն էր լրագրողներով, մարդկանցով: Ինձ թույլ տվեցին գնալ հիվանդասենյակ, քանի որ ինքս նախագահի թեկնածու էի: Հանդիպել եմ Բաղդասար Մհերյանին, լրագրող է: Երբ ուզել եմ տեսնել Հայրիկյանին, կինը ասաց, որ դեղեր է ընդունել, եւ չեմ կարողացել տեսնել Հայրիկյանին»,-այսպես սկսեց իր ցուցմունքը Պարույր Հայրիկյանի դեմ մահափորձի գործով որպես պատվիրատու մեղադրվող, ամբաստանյալ Վարդան Սեդրակյանը:
Նա ասաց, որ մի ցուցմունք կա իր դեմ՝ Սամվել Հարությունյանինը, նա ասել է, թե Հայրիկյանին վախեցնելու նպատակով է արել:
«Էլի կշարունակեմ մասնակցել դատական նիստերին, որեւէ կերպ չեմ խոչընդոտի, ոչ էլ ցանկություն ունեմ խոչընդոտելու: Չկա իմ վրա որեւէ ապացույց: Միակ ապացույցն այն է, որ քսաներեք օր առաջ Սամվել Հարությունյանը զանգել է ինձ:
Դուք որեւէ ապացույց ունե՞ք իմ դեմ:
Կարդացեք նաև
Որեւէ հարցի իրավունք ունեմ չպատասխանել, քանի որ գործը որեւէ կապ չունի իմ հետ:
Նույնը ասել եմ նախաքննության ժամանակ»,-ասաց ամբաստանյալը՝ հրաժարվելով պատասխանել հարցերին:
Կողմնակալ չլինելու համար հրաժարվեց նաեւ պատասխանել իր պաշտպանի հարցերին:
Սակայն ասաց, որ չի պատասխանելու, բայց հետագայում պատասխանեց մեղադրող Արամ Ամիրզադյանի հարցերից մի քանիսին:
«Հնչեցրեք հարցերը, որոնց չի ուզում պատասխանել»,-հորդորեց դատավոր Գագիկ Պողոսյանը:
«Հայրիկյանին տեսակցելու գնալու ժամանակ արե՞լ եք հայտարարություններ»,-հարցին ամբաստանյալն ասաց. «Գործում կա՞ նման հարց» եւ հորդորեց դատախազին հարցեր տալուց լինել զգուշավոր, հայտարարելով, որ լինելու է հանրապետության չորրորդ նախագահը:
Դատախազը հարցրեց. «Նախազգուշացո՞ւմ է»:
Այն հարցին, թե ինչ հարաբերությունների մեջ է եղել ամբաստանյալ Սամվել Հարությունյանի հետ, պատասխանեց՝ գործատուի եւ գործ անողի:
Պարույր Հայրիկյանի ներկայացուցիչ Լեւոն Բաղդասարյանին հետաքրքրեց, թե ինչպես է վաստակում գումարը, հարցրեց, թե արդյոք, չորս միլիոնի խաղադրո՞ւյք է դրել Վարդան Սեդրակյանը: Վերջինը հակադարձեց հարցնելով՝ ինձ խաղադրույքի համա՞ր են ազատազրկել: Այն հարցին էլ, թե տարեսկզբին հարյուր հազար դոլարի վարկ վերցրե՞լ եք, նա դարձյալ չպատասխանեց, ասելով, որ գործի հետ կապված չէ: Դատավորի հարցին էլ, թե դժգոհ եղե՞լ են արհեստավորներն իրենից, նա ասաց, որ լինելու դեպքում չէին աշխատի:
«Աշխատել են իմ մոտ, տեսել են մեծ գումար ունեմ, ուզել են այդ եղանակով աշխատել»,- հավելեց Վ.Սեդրակյանը:
«Որքան գումար ունեիք, չաշխատելով», դատավորի հարցին էլ պատասխանեց, որ իր աշխատածն է ծախսել:
Դատավորի «Խաղադրույք կատարե՞լ եք, որքան էր» հարցին էլ պատասխանեց, որ
«անձնական հարցեր են, որ կարող եմ չպատասխանել»:
