Արարատյան դաշտավայրի հողերը աղակալել են, եթե այսպես շարունակվի, պարենային անվտանգության խնդիր կառաջանա: Այսօր «Հենարան» ակումբում այսպիսի մտահոգություն հայտնեցին «Էկոլուր» հասարակական կազմակերպության նախագահ Ինգա Զառաֆյանը եւ բնապահպան Անի Կաղինյանը: Նրանց տվյալներով,
600 հազար հեկտարից 30 հազար հեկտարն արդեն աղակալված է, ինչը կազմում է Արարատյան դաշտավայրի հողերի 5 տոկոսը: Տիկին Զառաֆյանի խոսքերով, խորհրդային տարիներին այդ հողերը դրենաժային եղանակով մաքրվում էին, ներկայումս ոչ միայն չեն մաքրվում, այլեւ դաշտավայրում գործող ձկնաբուծարանները, ստորգետնյա ջրերը օգտագործելով, նպաստում են այդ աղակալմանը:
Անի Կաղինյանի խոսքերով, մութ ու ցուրտ տարիներին Արարատյան դաշտավայրի հողերը կերակրել են ողջ հանրապետությանը եւ տարեցտարի կորցնելով այդ հողերը, պարենային անվտանգության առաջ ենք կանգնելու: Ինգա Զառաֆյանը գտնում է, որ օրենսդրական լուրջ փոփոխություններ են անհրաժեշտ «Ընդերքի մասին» օրենսգրքում, հողային, ջրային օրենքներում, որպեսզի այդ հողատարածքները շահագործողը նաեւ պատասխանատվություն կրի եւ փոխհատուցումներ անի:
«Մենք պետք է սպառողի հոգեբանությունից դառնանք պահպանող: Կառավարության որոշումով մենք ամեն տարի կորցնում ենք գյուղատնտեսական նշանակության հողեր»: Տիկին Զառաֆյանի մտահոգությունները` տեսանյութում.
Կարդացեք նաև
Անի Կաղինյանը համոզված է, որ եթե պետությունը միջոցներ չձեռնարկի հողը գյուղացուն վերադարձնելու, ապա արտագաղթն անխուսափելի է, իսկ այդ պարագայում, ըստ բնապահպանի, եղած հողերն էլ կմնան անմշակ: Ինգա Զառաֆյանի խոսքերով, եթե հողը չմշակվի` կդեգրադացվի: Ըստ նրա, առանց այն էլ Հայաստանն անապատացման վտանգի առաջ է կանգնած:
Անի Կաղինյանի տվյալներով, այսօր մայրաքաղաքում` օդում փոշու պարունակությունը 4.1 անգամ գերազանցում է սահմանված նորման:
Տիկին Զառաֆյանի վստահեցմամբ, 2000 թվականի տվյալներով, Հայաստանի 81 %-ը: ենթակա է անապատացման, դրանից հետո այլ տվյալ չի հրապարակվել: Ըստ նրա, չի կարող ցուցանիշները դեպի լավը լինեն, քանի որ վիճակը ավելի վատթարացել է եւ բացասական հետեւանքները շարունակվել են:
Լուսինե ԲՈՒԴԱՂՅԱՆ
