Կառավարությունը չի՞ պատրաստվում օրենսդրական նախաձեռնությամբ հանդես գալ՝ Վերահսկիչ պալատի ստուգումների արդյունքում չարաշահումներ թույլ տված պաշտոնյաների պատիժը խստացնելու և նրանց քրեական պատասխանատվության ենթարկելու համար: Այսօր խորհրդարանում ԱԺ «Ժառանգություն» խմբակցության ղեկավար Ռուբեն Հակոբյանը հարց ուղղեց փոխվարչապետ, տարածքային կառավարման նախարար Արմեն Գեւորգյանին:
Ի պատասխան Արմեն Գեւորգյանը նշեց, որ կառավարության կողմից օրենսդրական նախաձեռնությամբ հանդես գալը կոռեկտ չէ, քանի որ ՎՊ-ն կոչված է վերահսկել կառավարության գործունեությունը. «Ես կառաջարկեի, որպեսզի այս վերջին տարիների խնդիրներին լուծումներ տրվեն պատգամավորների կողմից, եւ կառավարությունն իր հերթին միանա այդ աշխատանքներին: Բայց չեմ կարծում, որ կառավարությունը պետք է նախաձեռնի դա»:
Ռուբեն Հակոբյանը նաեւ հորդորեց հրապարակել այն ընկերությունների եւ անձանց անունները, ովքեր նախքան շինարարության ոլորտում մրցույթների անցկացումը՝ արդեն հաղթած են համարվում, ինչպես ՎՊ-ն էր բացահայտել:
«Ես, ցավոք սրտի, ի վիճակի չեմ լինելու բոլոր ոլորտների հետ կապված տեղեկություններ ներկայացնել: Եթե անձանց և կոնկրետ կազմակերպությունների անուններ են պետք, կարող ենք ճշտել և հրապարակել»,- պատասխանեց Արմեն Գեւորգյանը:
Կարդացեք նաև
Հիշեցնենք, որ մամուլում մի շարք հրապարակումներ եղան, համաձայն որոնց փոխվարչապետի անունը նույնպես առնչվում է շինարարական կազմակերպությունների հետ:
Նելլի ԳՐԻԳՈՐՅԱՆ
