Քիչ առաջ մեկնարկած խորհրդարանի արտահերթ նստաշրջանում շարունակվեց վերջին նստաշրջանում կիսատ մնացած Վերահսկիչ պալատի 2012 թվականի հաշվետվության քննարկումը: ՀՀ փոխվարչապետ, տարածքային կառավարման նախարար Արմեն Գեւորգյանն ասաց, որ ՀՀ կառավարությունը մեծ նշանակություն է տալիս ՎՊ-ի հաշվետվությանը եւ այս տարիների ընթացքում բազմաթիվ աշխատանքներ են կատարել`համատեղ ուժերով շտկելու առկա թերությունները: Կառավարությունում քննարկել են ՎՊ-ի հաշվետվությունը «կետ առ կեռ», կառավարության կայքէջում տեղադրված են շահագրգիռ կողմերի պատասխանները: Ասաց, որ ՎՊ-ի նշած խնդիրները միայն 2012-ին չե վերաբերվում. դրանք տասնամյակների խնդիր են: Այնուհանդերձ, փոխվարչապետը նաեւ նշեց, որ չի կարելի չհամաձայնել, որ տեղի է ունենում բյուջեի փոշիացում եւ բյուջետային ծախսերն ուղեկցվում են կոռուպցիոն ռիսկերով: «ՎՊ հաշվետվությունում արձանագրված բոլոր խնդիրների մասով համապատասխան միջոցներ ձեռնարկվում են, այլ հարց է, որ ներկայիս օրենսդրությամբ նման դեպքերի համար պատասխանատվությունը տնտեսական կամ քաղաքացիաիրավական բնույթ է կրում, այսինքն՝ գումարների վերականգնում, թերությունների շտկում, տուգանքներ։ Միգուցե այդ գործընթացներում ավելի մեծ կիրառում պետք է գտնի քրեական պատասխանատվության տարրը, որը նույնպես գործող օրենսդրության կատարելագործման հարց է»,- ասաց Արմեն Գեւորգյանը:
Փոխվարչապետն ասաց նաեւ, որ լիարժեք չի իրագործվում ՎՊ-ի այն իրավասությունը, որ առավել ցցուն դեպքերը պետք է դատախազութուն ուղարկվեն: Նկատեց, որ որ խորհրդարանական քննարկումների ընթացքում կառավարությանը հնարավորություն չի տրվում իր տեսակետն արտահայտել ու ստացվում է միակողմանի մեղադրանք, մինչդեռ ՎՊ-ի եւ կառավարության միջեւ մշտական քննարկումներ են տեղի ունենում չարաշահումների վերաբերյալ եւ համապատասխան քայլեր ձեռնարկվում:
«Կոնկրետ շինարարական ծրագրերի ընթացքում արձանագրված խնդիրները համատարած բնույթ չեն կրում, դրանք կոնկրետ խնդիրներ են»,-ասաց Արմեն Գեւորգյանը`հավելելով, որ դրանք իրենց հանգուցալուծումն են գտնում պայմանագրային հիմունքներով: Այսինքն, կապալառուն որոշակի ժամանակահատվածում ստանձնում է թերացումները վերացնելու պարտավորություն: Իսկ ընդհանուր առմամբ, ըստ Արմեն Գեւորգյանի, շինարարական ծրագրերը համապատասխան են պայմանագրային չափանիշներին:
Քանի որ Գյումրու տեխնոպարկի մասին շատ շահարկումներ եղան խորհրդարանում, Արմեն Գեւորգյանն ասաց, որ դա փուլային ծրագիր է եւ մանրամասն ներկայացրեց արդեն կատարված ու ընթացքի մեջ գտնվող ծրագրերի մասին`հավաստիացնելով, որ ծրագիրը դեռեւս կառավարության ուշադրության կենտրոնում է: Միջին եւ փոքր ձեռնարկատիրության զարգացման մասով էլ ասաց, թե խնդիրն այն է, որ բանկերը ռիսկային են համարում սկսնակ ձեռներեցներին վարկեր տրամադրել: Ասաց, որ կառավարությունը մեխանիզմներ է ներդրել նման վարկերի վերադարձնելիությունն ապահովելու համար:
Կարդացեք նաև
ՎՊ-ի բացահայտած մի շարք չարաշահումների մասով էլ ասաց, որ օրենսդրական բացեր են, մասնավորաբար Երեւանի հողային պաշարների օգտագործման մասով: Առաջարկեց վերանայել օրենսդրությունը`համապատասխանեցնելով արդի պահանաջներին:
Արմեն Գեւորգյանը տեղեկացրեց նաեւ, որ անցյալ տարվա մասով 1 միլիարդ 122 միլիոն դրամ գումար է վերադարձվել բյուջե`ՎՊ-ի բացահայտումների արդյունքում:
Նելլի ԳՐԻԳՈՐՅԱՆ
