«Ոսկե ծիրան» 10-րդ միջազգային կինոփառատոնի խաղարկային մրցույթում, ի թիվս այլ ֆիլմերի ներկայացված է հույն ռեժիսոր Նիկոս Կորնիլոսի «11 հանդիպում հորս հետ» (11 Meetings with my father) ֆիլմը:
Ֆիլմի հերոսուհին՝ Եվան, ուսանող է, ընդամենը քսան տարեկան եւ դասական ժանրի երգչուհի է պատրաստվում դառնալ: Օրերից մի օր աղջիկը որոշում է գտնել հորը՝ Թոմասին, որն իր գոյության մասին գաղափար անգամ չի ունեցել: Եվ ահա սրտի թրթիռով Եվան որոշում է իրականացնել գաղափարը, բայց…այն մարդը, որի արյունն է հոսում իր երակներով, իրականում տարբերվում է իր երազներում փայփայած կերպարից: Հայրը պահակ է բեռնատար ավտոմեքենաների հավաքակայանում, եւ կարելի է ասել, կյանքը երես է դարձրել նրանից:
Եվայի մայրը գեղեցիկ կին է՝ սկանդինավյան ծագմամբ, քսան տարի առաջ նա հանդիպել է առողջ, ամրակազմ Թոմասին, նրանից հղիացել ու ոչինչ չի ասել ապագա երեխայի մասին: Թոմասն այսօր դժբախտ է, դժգոհ, դեպրեսիվ, փոքր աղջիկ ունի մեկ այլ կնոջից, որի հետ մայրն արգելել է հանդիպել: Ինչ վերաբերում է Եվային, նա 11 հանդիպումների ժամանակ փորձում է «բացահայտել» նախկինում երբեւէ չհանդիպած հորը…
Կարդացեք նաև
Ինչպե՞ս վարվել՝ սիրե՞լ, թե՞ ատել միմյանց, եւ արդյոք արժե՞ր ճանաչել ընդամենը քո աշխարհ գալու մեջ դերակատարություն ունեցողին, որի հանդեպ օտարոտի ցգացողություններ են միախառնվել…
Ֆիլմում նկարահանվել են Եվա Գալագավրոուն եւ Լամբրոս Ապոստոլոուն:
Գոհար ՀԱԿՈԲՅԱՆ
