«Ընդդիմության աթոռի վրա աչք չունենք: Քաղաքական խնդիրներ կան, որն իր վրա պետք է վերցնի ընդդիմությունը, կան ակտիվ քաղաքական գործիչներ ընդդիմությունից, բայց ընդդիմությունը զրոյական դաշտից դուրս չի եկել: Դրա համար և այն դերն ենք կատարում, և մյուս դերակատարումն ունենք: Զրոն թիվ է, սպասում եմ, թե զրոյից առաջ թվանշանը կդնեն, թե՞ հետո»,- ԱԺ ճեպազրույցների ժամին հայտարարեց ՀՀԿ խմբակցության ղեկավար Գալուստ Սահակյանը`պատասխանելով լրագրողներից մեկի հարցին`կարծես ՀՀԿ-ն ընդդիմության «տեղերի վրա էլ աչք ունի»:
Գալուստ Սահակյանն, ըստ էության, չժխտեց, որ ՀՀԿ-ն որոշել է ընդդիմությանը դերն էլ կատարել՝ միաժամանակ նշելով, որ դա չի նշանակում, որ ՀՀԿ-ն ընդդիմություն է դառնում: Նա նշեց, որ նախօրեին խորհրդարանական քննարկումներից պարզվեց, որ ըմբոստ, կիսաըմբոստ ու պոպուլիստ քննադատողները «Վերահսկիչ պալատի մասին» օրենքը չէի կարդացել և փորձում էին դատական ատյանի վերածել Ազգային ժողովը:
«Դա պատահական չէ, որ Վերահսկիչ պալատի հաշվետվությունն ի գիտություն ենք ընդունում, ոչ թե քվեարկում ենք, օրենք ենք դարձնում, այլ ի գիտություն ենք ընդունում, որովհետև դա հրապարակվում է, և եթե օրենք ես դարձնում, դա դառնում է մի տեսակ վճիռ-մեղադրական»,- ասաց Գալուստ Սահակյանը: Այնուհանդերձ, Սահակյանը գոհ է ծավալված քննարկումներից, քանի որ բոլոր ուժերի ներկայացուցիչներն իրենց կարծիքը կարողացել են արտահայտել: Նա հորդորում է համբերել եւ տեսնել, թե ինչպիսին է կառավարության կարծիքը: ՀՀԿ խմբակցության ղեկավարի խոսքով՝ ամենակարևորը քաղաքական դիրքորոշում կլինի, վարչարարական դիրքորոշում, եթե անհրաժեշտություն լինի՝ նաև քրեական դիրքորոշում:
Ասաց, որ պաշտոնյաներն իրենց պատասխանատվության շրջանակներում պետք է կարգավորեն ամեն ինչ եւ որ ժողովուրդը պետք է ի դեմս պետական չինովնիկի տեսնի իր իրավունքների պաշտպանին: «Մեզանում դրսևորված է հետևյալը՝ նույնիսկ, երբ ընդդիմությունից գալիս ես իշխանություն, երկրորդ օրը հասարակության աչքում դառնում ես սրիկա, թալանչի, կոռուպցիայով զբաղվող անձնավորություն: Նախ էս հոգեբանությունը պետք է կոտրենք: Կոտրելու հիմքերից մեկը այն է, որ ինքներս մենք պիտի գտնենք, և այնպես չի, որ ամեն ինչ հենց էնպես ստացվում է, և էնպես չի, որ Վերահսկիչ պալատի հաշվետվությունը չէինք կարդացել, չգիտեինք և ինչ-որ քննարկումներ չեն եղել»,- նշեց նա: Ամեն մարդ էլ, ըստ Գալուստ Սահակյանի, ունի չարամիտ մոտեցում՝ հափշտակելու, կողոպտելու. «Դրա համար մենք մարդուն պետք է այդ աստիճանի չհասցնենք, իսկ դա կարող է զսպել հասարակությունը: Մենք պետք է գնանք էն ճանապարհով, որ յուրաքանչյուր պետական չինովնիկ հարազատական զգացում ունենա նախ ինքը ժողովրդի հանդեպ, ապա ժողովուրդը պետական չինովնիկի հանդեպ»:
Նա յուրահատուկ մոտեցում ունի ՎՊ-ի բացահայտած չարաշահումների առիթով. «Չարաշահումներ, հանցագործություններ չի կարելի անձերի վրա բարդել, դա հասարկական երևույթ է, իսկ իշխանությունները, հասարակական ու քաղաքական ուժերն էլ պիտի հետամուտ լինեն, որպեսզի հասարակությունը նման հանցագործությունների համար ազատ իր միտքը, խոսքը արտահայտի: Դա ավելի պրոֆիլակտիկ երևույթ է, քան բռնենք մի տասը հոգու մորթենք, ասենք՝ խնդիրն ավարտված է»,-ասում է ՀՀԿ խմբակցության ղեկավարը`հավելելով, որ չարաշահումները հենց նրանով են չարաշահում, որ չեն համաձայնեցվում, «սողված գործողություններ» են կատարվում, հետո արդեն մի քիչ լավանում է վիճակները, արդեն վստահ են լինում և ընկնում են թակարդը:
Ավելի կոնկրետ հարցին`ՎՊ բացահայտումների հիման վրա պետք է սպասե՞լ քերական գործերի հարուցման, թե ոչ, Գալուստ Սահակյանը նշեց, որ առաջին հերթին հասարակությունը պետք է վերահսկողություն սահմանի: Նա նշեց, որ այս չարաշահումների հարցում վերահսկող մարմինների, իրենց ու ժամանակաշրջանի մեղքն էլ կա. «Իմ խնդիրը ոչ թե նա է, որպեսզի մեղավորներ գտնեմ, դա այլ մարմինների գործն է, իմ խնդիրը նա է, որպեսզի քաղաքական այնպիսի միջոցառումներ կամ մոտեցումներ ցուցաբերվի, որ հստակ ձևով ժողովուրդը կարողանա ճիշտ բանաձևել ամեն ինչ»: Մեկ այլ ձեւակերպմամբ համանման հարցին`ՀՀԿ-ն չի՞ որոշել՝ պատիժներ լինելու են, թե ոչ, Գալուստ Սահակյանը նշեց, որ կուսակցությունը դատական ատյան չէ, որ մարդկանց պատժի. «Ես ասացի՝ կլինեն քաղաքական որոշումներ, այսինքն՝ եթե կգտենք, որ էս թափթփվածությունը, թերություները, փոշիացումները, անարդյունավետ օգտագործումներ են, դա քաղաքական որոշման խնդիր է: Եթե կլինեն հանցագործություններ, դա քրեական որոշման խնդիր է: Եթե կլինեն հատվածային, ոլորտային առումով խնդիրներ, որտեղ չինովնիկներ են մեղավոր, էդտեղ կլինեն նաև վարչարարական մոտեցումներ: Հուսով եմ, որ անպայման անհետևանք չեն մնա քննարկումները»:
Նելլի ԳՐԻԳՈՐՅԱՆ
