Այսօր Երեւանի պետական համալսարանում ՀՀ ԱՆ ԴԱՀԿ ծառայության եւ ԵՊՀ
իրավագիտության ֆակուլտետի միջեւ ստորագրվեց համագործակցության մասին հուշագիր:
Հուշագիրը ստորագրած երկու կողմերն էլ նշեցին, որ դրա ստորագրումը ձեւական չէ, եւ մեկ ամսվա ընթացքում կստեղծվեն համատասխան աշխատանքային խմբեր, որոնց միջոցով հնարավոր կլինի ամրապնդել համագործակցությունը:
ՀՀ գլխավոր հարկադիր կատարող Միհրան Պողոսյանը, խոսելով հուշագրի կարեւորության մասին, ասաց.«Ծառայությունը երկար ժամանակ այս համագործակցության կարիքն ուներ: Ես հույս ունեմ, որ փոխադարձ աշխատանքը մեր պետությանը կբերի նորանոր հաջողություններ,եւ հարկադիր կատարման ոլորտում մենք կկարողանանք ավելի առաջ շարժվել»:
Կարդացեք նաև
ԵՊՀ իրավագիտության ֆակուլտետի դեկան Գագիկ Ղազինյանը Դատական ակտերի հարկադիր կատարման ծառայության հետ հուշագրի տեղծման օրն անվանեց պատմական ու ասաց. «Մենք գործ ունենք բոլորովին այլ իրավիճակի հետ: ԴԱՀԿ ծառայությունը մեր հանրապետությունում պատմականորեն շատ երիտասարդ է՝ ընդամենը 15 տարվա կյանք ունի,եւ այս առումով այն բավականին բաց դաշտում է գործում: Սա այն բացառիկ դեպքերից է, երբ ծառայությունն իր գործունեությամբ շատ առաջ է անցել: Մենք համոզված ենք, որ այս համագործակցության արդյունքում կկարողանանք նաեւ նպաստել ծառայության գործունեությանը տեսական եւ օրենսդարական առումներով»:
Հուշագրի ստորագրումից հետո լրագրողների հետ ունեցած ճեպազրույցում գլխավոր հարկարդիր կատարող Միհրան Պողոսյանը խոստովանեց, որ ծառայությունն ունի տեսական եւ կրթական բացթողումներ, որոնք հնարավոր կլինեն շտկել իրավագիտության ֆակուլտետի հետ համագործակցությունից հետո:
«Խոսքը վերաբերում է եւ աշխատողների պատրաստմանն եւ վերապատրաստմանը: Մեզ մոտ տեսության լրացման խնդիր կա: Մենք մեկ ամսվա ընթացքում, գուցե ավելի շուտ կկազմենք աշխատաքային խումբ եւ կնախագծենք պրակտիկ աշխատանքները»,- ասաց Մ.Պողոսյանը:
Իսկ ԵՊՀ իրավագիտության ֆակուլտետի դեկան Գագիկ Ղազինյանը նկատեց, որ իրավագիտության ֆակուլտետում սովորող ուսանողները գործնական պարապմունքերի պակաս ունեն եւ բուհն ավարտելուց հետո դժվարանում են իրենց մասնագիտությանը համապատասխան աշխատանք գտնել:
«Տասնյակ տարիների ընթացքում մեր կադրերը բարձր պատրաստվածություն ունենալով հանդերձ խիստ դժվարացել են իրենց գիտելիքները գործնականում կիրառելու հարցում: Ունեցել ենք փայլուն ուսանողներ, որոնք ավարտելուց հետո գործանական աշխատանքում դժվարություններ են ունեցել»,- ասաց իրավագիտության ֆակուլտետի դեկանը:
Աշոտ ԱԹԱՅԱՆ
