Այսօր կառավարության նիստի օրակարգում քննարկվել է նաև Շիրակի մարզի Բայանադուր գյուղի գյուղապետ Հովակիմ Սարգսյանի հրաժարականի հարցը: Կառավարությունը որոշել է սեփական դիմումի համաձայն վաղաժամկետ դադարեցնել նրա լիազորությունները:
Իսկ թե ինչո՞ւ է ԲՀԿ-ական գյուղապետը հրաժարական տվել, Շիրակի մարզպետարանի տարածքային վարչության տեղական ինքնակառավարման հարցերով վարչության պատասխանատու Ռուբիկ Հարությունյանը Aravot.am-ին փոխանցեց, որ գյուղապետը դիմում է ներկայացրել` նշելով, որ հիվանդ է, գնում է բուժման արտերկիր: Մինչդեռ, ըստ գյուղում տարածված խոսակցությունների, վերջինս որդու հետ մեկնել է խոպան` Ռուսաստանի գյուղերից մեկը: Նշենք, որ այս գյուղապետը երկրորդ անգամ էր ընտրվում, վերջին ընտրությունների ժամանակ նա հաղթել է ՀՀԿ-ական թեկնածու Դավիթ Դավթյանին, թեժ մրցակցություն է եղել, և այս գյուղի բոլոր նախորդ գյուղապետերը սատարել են ՀՀԿ-ական թեկնածուին: Այդուհանդերձ 45-ամյա գյուղապետը կարողացել է հաղթել և տրամադրված է եղել նորմալ աշխատելու: Մենք Շիրակի մարզպետարանի տարածքային վարչության աշխատակիցներից հետաքրքրվեցինք, թե գյուղապետը նորմալ աշխատե՞լ է: Ըստ Ռուբեն Հարությունյանի, նա միշտ շատ լավ է աշխատել, սակայն վերջին տարիներին մի տեսակ թուլացել էր: Գյուղապետին բնութագրում են որպես «համեստ, ընտիր» տղայի: Սակայն նկատենք, քանի որ գյուղը քիչ բնակչություն ունի, 764 մարդ է ապրում, սեփական եկամուտները շատ չեն, հետևաբար և բավական ցածր է գյուղապետի աշխատավարձը, այն կազմում է մոտավորապես 120-130 հազար դրամ, որն էլ, ամենայն հավանականությամբ, այլևս չի բավարարել ինչպես անչափահաս, այնպես էլ ուսանող որդիներ ունեցող հորը` նրանց տարրական ծախսերը հոգալու համար: Նշենք, որ Հայաստանի համայնքների միության պաշտոնական կայքում գյուղը բնութագրվում է որպես սոցիալ-տնտեսական վատ վիճակում գտնվող տեղանք, որտեղ չկա ջրամատակարարում, գազ, հեռախոսակապ, երեխաների թիվը նվազում է, արտագաղթը մեծ է , իսկ համայնքի բնակիչների 10 տոկոսը ունեն բարձրագույն կրթություն և լավ մասնագետներ են:
ՆՈՒՆԵ ԱՐԵՎՇԱՏՅԱՆ
