Այսօր Արմավիրում տեղի ունեցող կառավարության նիստի ժամանակ մարզպետ Աշոտ Ղահրամանյանը, մի շարք խնդրների անդրադառնալով, դիմեց նաեւ առողջապահության նախարարությանը, որպեսզի բուժհաստատությունների օպտիմալացման ծրագրի շրջանակներում ուշադրություն դարձնեն նաեւ Արմավիրին:
Այս առնչությամբ առողջապահության նախարար Դերենիկ Դումանյանն ասաց, որ Արմավիրի բժշկական կենտրոնը հիմնանորոգվել է 2,5 մլն դոլարին համարժեք դոլարով, 42 ամբուլատորիաներ վերակառուցվել են կամ վերանորոգվել: Ծախսվել է շուրջ 35 մլն դոլար, բայց դեռեւս մնում է 10 ամբուլատորիաների վերանորոգման խնդիրը: Պարոն Դումանյանի խոսքերով՝ «Դեռեւս խնդիր է Վաղարշապատի ծննդատունը»: Այստեղ, ինչպես նշեց նախարարը, կան հրաշալի մասնագետներ, բայց շենքային պայմանները բավարար չեն: Այստեղից հղիները հիմնականում գալիս են Երեւան ծննդաբերելու: Պարոն Դումանյանի խոսքերով՝ այս տարվա առաջին 6 ամսում 1356 արմավիրցի կանայք են ծննդաբերել, որոնցից 723-ը՝ մարզում:
Պարոն Դումանյանը հիշեցրեց, որ մայիսի 1-ի իր հրամանով մարզերի հղիները, եթե չունեն պաթոլոգիական կամ այլ ծառայությունների խնդիր, պետք է իրենց համայնքում ծննդաբերեն Իսկ նրանք, ովքեր ունեն պաթոլոգիական խնդիրներ, ուղեգրով իրավունք ունեն անվճար ծննդաբերել նաեւ Երեւանի կլինիկաներում: Այն հղիները, որոնք խնդիր չունեն, բայց ցանկություն ունեն մայրաքաղաքում սպասարկվել, պետք է վճարեն: Դերենիկ Դումանյանը վստահեցրեց, որ իր այս հրամանից հետո,, 15 տոկոսով կրճատվել է մարզերից Երեւան եկող հղիների քանակը:
ՀՀ վարչապետ Տիգրան Սարգսյանի այն հարցին, թե ի՞նչ փուլում է Մեծամորի պոլիկլինիկայի խնդիրը, քանի որ մեծամորցիները հիմնականում այդ հարցն են բարձրացնում, նախարարը վստահեցրեց, որ այս տարի արդեն կսկսվեն Մեծամորի պոլիկլինիկայի վերակառուցման աշխատանքները:
Կարդացեք նաև
Մարզպետ Աշոտ Ղահրամանյանը նիստին իր զեկույցի ընթացքում ասաց, որ «հետագայում կարկտահարության դեպքերը նվազեցնելու նպատակով մարզում կառուցվելու է եւս 50 հակակարկտային կայան եւ 15 համայնքներում գործող 30 համայնքային սեփականություն հանդիսացող կայանները հանձնվելու են արտակարգ իրավիճակների նախարարությանը»:
Նելլի ԲԱԲԱՅԱՆ
