Արմավիր խմելու ջուր հասցնելը մեծ ծախսերի հետ է կապված: Այսօր կառավարության Արմավիրի մարզ արտագնա նիստի ժամանակ ասաց Ջրային տնտեսության պետական կոմիտեի նախագահ Անդրանիկ Անդրեասյանը: Իսկ վարչապետ Տիգրան Սարգսյանն էլ հետաքրքրվեց՝ «Այսինքն՝ ծախսատար խնդիր է, մոտակա տարիներին այդտեղ արմատական փոփոխություններ չե՞ն լինելու, մինչև այլ ծախս չանե՞նք՝ խմելու ջուրը բերելու»: Անդրանիկ Անդրեասյանը նշեց, որ այո, դա հսկայական ծախսերի հետ է կապված: Բացի այս, ջրի որակն էլ այս մարզում լուրջ խնդիր է, ինչպես նշեց պարոն Անդրեասյանը, բնակիչները ջուրը օգտագործելու համար նախապես եռացնում են, իսկ խմելու համար այլ ջուր են օգտագործում: «Դե մենք պետք է կողմնորոշվենք՝ մեզ համար Արմավիրի մարզում խմելու ջուրն է առաջնահերթ, թե՞ ոռոգման»,- հարցրեց Տիգրան Սարգսյանը:
«Պարոն, վարչապետ, ես կարծում եմ՝ երկու տեղում էլ ունենք խնդիրներ»,- ասաց Անդրեասյանը: Ջրտնտպետկոմի ղեկավարը նշեց, որ ոռոգման ջրի դեֆիցիտ էլ կա Արմավիրում:
Բացի այս, պարոն Անդրեասյանը նաեւ նշեց, որ անհրաժեշտ է ջրամբարների կառուցում, քանի որ շուտով Արաքսում հնարավոր է քիչ ջուր մնա, ուստի պետք է ջրային ռեսուրսների պաշարման հարցն էլ լուծել:
Նելլի ԲԱԲԱՅԱՆ
