ՄԱԿ-ի Զարգացման ծրագրի Հայաստանյան գրասենյակի աջակցությամբ՝ ՀՀ կառավարության աշխատակազմի «Օրենսդրության կարգավորման ազգային կենտրոն» ծրագրերի իրականացման գրասենյակ պետական հիմնարկը Կապանում կազմակերպել էր «Կարգավորիչ գիլյոտին ծրագիրը Հայաստանում» հանրային քննարկում-խորհրդակցությունը, որը միչեւ այժմ կայացել էր նաեւ հանրապետության մի քանի մարզերում:
Մարզերում կազմակերպվող հանդիպում-քննարկումների նպատակը հանրությանը, գործարարներին, ՀԿ-ների, ՏԻՄ-երի նեկայացուցիչներին իրազեկելն է ծրագրի մասին, ինչպես նաեւ տեղում ծանոթանալ եւ շահառուներից լսել իրավական դաշտում առօրյայում բախվող խնդիրների մասին՝ վերջիններիս ներգրավելով բարեփոխումների առաջարկների քննարկումներին: Կապանում կայացած քննարկման երկրորդ հատվածում հադիպման մասնակիցները, խմբերի բաժանվելով, քննարկեցին հարկային եւ մաքսային, ձեռնարկատիրության, սոցիալական հարցերը եւ համայնքային զարգացման խնդիրները, այնուհետեւ դրանք ներկայացրեցին Օրենսդրության կարգավորման ազգային կենտրոնին՝ իրավական դաշտի վերանայման եւ բարեփոխման գործընթացում հաշվի առնելու համար:
«2012թ.-ի մայիսից ենք սկսել մեր աշխատանքները, մոտ մեկ տարվա փորձ ունենք: Երեք ոլորտում՝ առողջապահութան, տրանսպորտի եւ հանրային ծառայությունների բնագավառներում, արդեն ուսումնասիրություններ ենք արել եւ ավարտել, օրենսդրական նախաձեռնությունների փաթեթներն արդեն ընդունված են: Մարզերում հանդիպումների ժամանակ տարբեր ոլորտներից են դժգհում, ավելի շատ բողոքում են հարկային ոլորտից: Պրոցեսներ կան, որ մարդը պիտի ավելի շատ ժամանակ ու ռեսուրս ծախսի, քաշքշուկների միջով անցնի, որից հետո միայն հասնի իր նպատասկին», – նշեց Օրենսդրության կարգավորման ազգային կենտրոնի փոխտնօրեն Վահե Չիբուխչյանը:
Կապանում հանդիպման ընթացքում համայնքային զարգացման խնդիրների շուրջ քննարկում ծավալած խմբերից մեկում մարզի գյուղական համայնքների ղեկավարներն իրենց դժգհությունն ու անհամաձայնությունը հայտնեցին համայնքների խոշորացման ծրագրին՝ համապատասխան պարզաբանումներով հիմնավորելով իրենց մտահոգությունները, որ դրա արդյունքում գյուղաթափ կլինեն առանց այն էլ ներկայումս աննախանձելի վիճակում գտնվող Սյունիքի բնակավայրերը:
Կարդացեք նաև
Մերի ՍՈՂՈՄՈՆՅԱՆ
