Այսօր Հայկական պետական մանկավարժական համալսարանի սպորտային դահլիճում անցկացվեց «Պատանի քիմիկոսների համահայկական չորրորդ մրցաշարի» քառորդ եզրափակիչ փուլը:
Արդեն չորրորդ տարին է, ինչ «Այգ» կրթական հիմնադրամը կազմակերպում է քիմիայի նվիրյալ դպրոցականների համար մրցույթը, որին այս տարի մասնակցում են շուրջ 18 թիմեր` հանրապետության տարբեր շրջաններից: Այս մրցաշարը ինտերակտիվ խաղի սկզբունքով անցկացվող մրցույթ է, որտեղ 9-12-րդ դասարանների աշակերտները լուծում են քիմիայի բարդ առաջադրանքներ, բանավիճում գիտական թեմաների շուրջ և ներկայացնում իրենց հետազոտության արդյունքները:
Մեզ հետ առանձնազրույցում ստուգող հանձնաժողովի անդամ, ՊՔՀՄ ժյուրիի նախագահ, պրոֆեսոր Համբարձում Խաչատրյանը, անդրադառնալով մրցույթին, ասաց, որ նպատակը քիմիայի նկատմամբ հետաքրքրություն առաջացնելն է: «Այստեղ ավելի շատ խաղի էլեմենտներ են մտնում, և եթե օլիմպիադաներում ամեն մեկն իր համար է պայքարում, ապա այս պարագայում գործում է թիմային աշխատանքը: Մենք ստուգում ենք ոչ միայն գիտելիքը, այլև այն հրամցնելու կարողությունը և առողջ բանավիճելու հմտությունները»,-ասաց Խաչատրյանը, հավելելով, որ նախքան մրցույթը, երեխաները նախօրոք նախապատրաստվում են հարցերին, որտեղ յուրաքանչյուր թիմի համար մարզիչ հանդիսանում է հենց ուսուցիչը:
Խաչատրյանը ցավով նշեց, որ քիմիային լավագույնս տիրապետող աշակերտները շուրջ10-15 տարի է իրենց ուսումը շարունակում են Բժշկական համալսարանում. «Քիմիայի օլիմպիադայի հաղթողը, թվում է թե, պետք է գնա ԵՊՀ-ի քիմիայի ֆակուլտետ, որ դառնա քիմիկոս, սակայն երիտասարդներն իրենց ապագան այս բնագավառում չեն տեսնում, քանի որ քիմիական արդյունաբերությունը իսպառ վերացել է»:
Կարդացեք նաև
Վերջինիս փոխանցմամբ` քառորդ եզրափակչի արդյունքներով 6-12 թիմեր, կախված արդյունքների աղյուսակի բաշխվածությունից, կանցնեն կիսաեզրափակիչ փուլ, որը նախատեսվում է անցկացնել այս տարվա հոկտեմբերի երկրորդ կեսին:
Քրիստինա ՄԻՐԶՈՅԱՆ
