Կարկուտից տուժած արմավիրցիներին սփյուռքից ընդամենը 1 մարդ է օգնել:
Այս պահի դրությամբ կարկուտից տուժած արմավիրցիներին օգնելու համար ստեղծված հիմնադրամ է փոխանցվել 74 միլիոն դրամ գումար: Այսօր «Ազդակ» ակումբում այս մասին ասաց ՀՀԿ խմբակցության պատգամավոր Ալեքսան Պետրոսյանը: Պատգամավորը կոչ արեց ավելի ակտիվ լինել, քանի որ սա այն հարցը չէ, որ գնալով սառի կամ կորցնի իր արդիականությունը. «Գյուղացին ամեն օր սպասում է այդ գումարին: Մեր խնդիրը կայանում է նրանում, որ ավելի շատ գումար հավաքենք»:
Ալեքսան Պետրոսյանը թվարկեց ամենամեծ գումար փոխանցած գերատեսչությունների անունները. 20 միլիոն դրամ հիմնադրամին փոխանցել է ոստիկանությունը, 20 միլիոն 100 հազար դրամ` Պետկամուտների կոմիտեն, 10 միլիոն դրամ` Կենտրոնական բանկը, Ազգային ժողովը փոխանցել է 6 միլիոն դրամ: «ՄԱՊ» ընկերությունը` 4 միլիոն: Ըստ բանախոսի՝ Դատարանների միությունը 2 միլիոն է փոխանցել: Կան նաեւ անհատ քաղաքացիներ, որոնք պատգամավորի խոսքերով, հազար, 5 հազար,10 հազար դրամ են փոխանցում: Արմավիրցիներին գումարով օգնելու ցանկություն է հայտնել նաեւ Երեւանի կոնյակի գործարանի ղեկավարությունը: Մոտ օրերս գործարանը կփոխանցի 20 միլին դրամ:
Պատգամավորը լրագրողներին կոչ արեց խնդիրն իր լրջությամբ ու կողմերով հասցնել սփյուռքահայերին: Սփյուռքից առայժմ Շվեյցարիայում բնակվող մի կին է գումար փոխանցել` 500 դոլար:
Կարդացեք նաև
Հարցին, թե բաշխումն ինչպե՞ս է լինելու, պարոն Պետրոսյանն ասաց, որ առաջինը պետք է լսել գյուղացիների, ֆերմերների կարծիքը. «Ես պետք է աշխատեմ այնպես անել, որ թափանցիկ լինի, ոչ ոք թող չմտածի, որ այդ գումարների նկատմամբ ինչ-որ ոտնձգություն կլինի: Ես միշտ ասել եմ, երբ ինչ-որ բան ուզում ես ազնիվ անես, շատ հեշտ է, անազնիվ անելն է դժվար»:
Հիմնադրամը նամակ-խնդրանքով դիմել է առաջին 300 խոշոր հարկատուներին, գումարի տեսքով արձագանք ունենալու դեպքում նամակով շնորհակալագիր են ուղարկում տվյալ տնտեսվարողին:
«Մարդուն օգնելու համար պետք չէ հարուստ լինել: Թող չասեն՝ սպասեք հարստանամ. նոր կօգնեմ»,-նկատեց պարոն Պետրոսյանը: Նա գյուղացիներին հորդորել է, որ վարչապետի եւ բանկերի միջեւ ձեռք բերած պայմանավորվածությունը խախտելու պարագայում, ըստ որի, սառեցվել են գյուղացիների վարկերի տոկոսները, անմիջապես զանգեն իրեն տեղյակ պահեն:
Գումարը կբաժանվի՝ պահպանելով այն սկզբունքը, թե որ գյուղը կամ ընտանիքը որքանով է տուժել: Հարցին՝ հետագայում է՞լ կգործի հիմնադրամը, պարոն Պետրոսյանն ասաց, որ «չի կարող ողջ կյանքը գումար ուզել»: Ըստ նրա, հիմնադրամը բացվել է 46 գյուղերի համար:
«Վարունգ, պոմիդոր, սմբուկ աճեցնող գյուղացիները կրկին սածիլներ են դրել եւ քիչ նվազ, բայց բերք կստանան, բայց խաղող կամ ծիրան ունեցողը հաջորդ տարի կամ երկու տարի հետո միայն բերք կունենան»:
Լուսինե ԲՈՒԴԱՂՅԱՆ
