Հանրապետականները Վերահսկիչ պալատի նախագահից իմացան, որ պետբյուջեի փողերը լայնորեն յուրացվում են:
Այսօր ԱԺ-ում Վերահսկաիչ պալատի նախագահ Իշխան Զաքարյանը ներկայացրեց 2012-ի տարեկան հաշվետվությունը եւ այն բազմաթիվ խախտումները, որոնք հայտնաբերել են տարբեր ոլորտներում:
ԱԺ նախագահ Հովիկ Աբահամյանն ապշած էր հաշվետվությունը լսելով: Երբ կարդացել է Վերահսկիչ պալատի հաշվետվությունը, Հովիկ Աբրահամյանը մտածել է, որ այն դեռ պետք է քննարկվի պատկան մարմինների հետ, եւ հնարավոր է, որ դրանք իրականությանը չեն համապատասխանում: Սակայն զարմացել է, երբ լսել է, որ դա հաշվետվություն է: Նրա խոսքերով՝ «Զարմացած եմ, որ մենք քննարկում ենք մի հարց, որտեղ մենք գործ ունենք, կոպիտ ասած, թալանչիների հետ, յուրացումների հետ եւ որեւէ քայլ մենք չենք իրականացնում: Պարոն Զաքարյան, ես զարմացած եմ, այդ մարդկանց բոլոր գործերը պետք է ուղարկվի դատախազություն: Ընդհանրապես սա ոնց որ շարունակական բնույթ է կրում, որովհետեւ բազմաթիվ ելույթներ են եղել, հաշվետվություններ են եղել, որ նույն սխալները, նույն յուրացումները կրկնվել են: Ընդհանրապես, որ դուք քննարկում եք գերատեսչությունների ղեկավարների հետ, ի՞նչ պատասխան են տալիս՝ այնպես շատ լավ ընդունում են, որ յուրացրել են, ու եթե չբռնեիք՝ կտանեին տո՞ւն: Սրա վերջը ի՞նչ է լինելու: Խոսում եք ստվերից, իրական փողերը բյուջեի լափում են որոշ մարդիկ, եւ մենք ոչ մի քայլ չենք անում իրականում: Ես ուզում եմ հասկանալ, որ քննարկում եք՝ էդ չինովնիկներն ի՞նչ են ասում: 200 մլն որ յուրացրել են, 100 մլն կամ 10 կամ 20 մլն, ի՞նչ պատասխան են տալիս»:
Կարդացեք նաև
Իշխան Զաքարյանը պատասխանեց, որ Ջրտնտպետկոմը չի ընդունել խախտումը, կոնկրետ օրինակներ են ցույց տվել, որ նախագծահաշվարկային փաստաթղթերը չեն համապատասխանել լիցենզիոն պայմաններին. «Մենք բավականին լայն քննարկում ենք անցկացրել ՀՀԿ-ի հետ: ՀՀԿ խմբակցությունում շատ մանրակրկիտ մենք քննարկել ենք գրեթե բոլոր խնդիրները: Կառավարության նիստում ՀՀ վարչապետը մեկ առ մեկ բոլորին հարցրել է, թե ՎՊ-ի կողմից արձանագրված խախտումների հետ կապված ինչ են արել, վերջում վարչապետը հայտարարել է, որ իրենք շատ շնորհակալ են ՎՊ-ի կատարած աշխատանքի արդյունքներից: Վարչապետի հանձնարարությամբ բոլորի պատասխանները տեղադրված են կառավարության կայքէջում: Գրված է՝ հայտնաբերվել է, կողքը գրված է պատասխան»:
Իշխան Զաքարյանն ընդգծեց, որ շատ քիչ դեպքերում է, որ պատասխանը կարելի է համարել պատասխան. «Նույն բիոզուգարանների հետ կապված՝ մենք ասում ենք, որ անարդյունավետ ենք ծախսը գնահատում, պատասխանը հետեւյալն է՝ մեկը աշխատում է, մեկը՝ չի աշխատում, այսպես, այնպես եւ այլն: Վարկային մասն ասում ենք՝ վերադարձելիության աստիճանը թույլ է, հուսալիությունը՝ քիչ, ասում են՝ գիտեք, էսինչը մահացել է, ինչ-որ մեկի իրավունքները փոխանցվել են մյուսին»:
Հաշվետվությունից ապշած եւ բարկացած էր նաեւ ԱԺ փոխնախագահ Էդուարդ Շարմազանովը: Նրա խոսքերով՝ «Եթե մարդ մսխել է գումարներ ու որոշել է ապրել չաղ ու բախտավոր, դա լրիվ այլ բան է: Մեզ համար անթույլատրելի է կոռումպացված չինովնիկ ունենալը: Էդ չաղ ու բախտավոր չինովնիկների ժամանակներն անցել են»:
Հռիփսիմե ՋԵԲԵՋՅԱՆ
Եթե այդ գործընթացներին մասնակից չեք,ուրեմն մի ուրիշ գործընթացի եք մասնակից,որի մասին երբեք Իշխան Զաքարյանը չի բարձրաձայնի,ավելի ճիշտ երբեք այդ գործընթացները չեն բացահայտի….ու այսպես մինչև…Մեկը հարցներ թե այդ կաշառակերերին,յուրացնողներին,թալանչիներին,հանցագործներին ով է նշանակում այդ պաշտոններին և հետները կիսվում…ամենաշատը դրանց ազատեք այդ պաշտոններից ու տեղափոխեք մեկ այլ ուրիշ պաշտոնի կամ դարձնեք պատգամավոր….Վարդան Այվազյանն էլ ձեզ օրինակ….չնայած եթե ուզենք լիքը օրինակներ կբերենք….
Վայ վայ վայ: Թե չէ Աբրահամյանը, Շարմազանովը, կամ հենց Սարգսյանը բաժին չունեն էդ թալաններից ու լուսնից իջնելով ապշած են անօրինությունների վրա: