ԵՄ-ի հետ ինտեգրացիան չպետք է իրականացնի այն ուժը, որն օլիգարխիայի եւ կոռուպցիայի կրողն է՝ կարծում է Անդրիաս Ղուկասյանը:
«Համաձայնություն» կենտրոնը եւ Ֆրիդրիխ Էբերտի անվան հիմնադրամը այսօր սեմինար-քննարկում էին կազմակերպել`«ՀՀ-ԵՄ Ասոցացման համաձայանգիր. անվտանգության հնարավորություններ եւ մարտահրավերներ» թեմայի շրջանակներում:
Կարդացեք նաև
Քննարկման ընթացքում «Ազատ դեմոկրատներ» կուսակցության նախագահ Խաչատուր Քոքոբելյանը, անդրադառնալով ավելի քան քսան տարի շարունակվող եվրոինտեգրմանը, նկատեց, որ եվրոինտեգրման եւ ՌԴ-ի հետ Եվրասիական համագործակցության հարցերը պետք է քննարկվեն քաղաքական, տնտեսական անվտանգության լայն առումով:
Պետք է քննարկվի նաեւ Հայաստանի համար ՌԴ-ի նշանակության հարցը, նշեց Խ.Քոքոբելյանը.«Ի՞նչ է նշանակում՝ «կամ-կամ»: Ընտրության հարց չի կարելի դնել… Շատ դեպքերում «եւ-եւ»-ի ու «կամ-կամ»-ի միաժամանակ կիրառումն անհնարին է»:
Պետք է ԵՄ-ի հետ էլ հնարավորւթյուն ունենանք անվտանգության հարցեր լուծել՝ նշեց նա:
Անդրադառնալով կարծիքին, թե եվրոպամետ ընդդիմության կարիք ունի Հայաստանը, նա ասաց, որ համախմբում պետք է լինի կոնկրետ խնդիրների, նպատակների շուրջ: «Հայաստանի բիզնեսմենները վախեցած են եվրոպական շուկայից: Թիվ մեկ գերխնդիրը պետք է լինի` բարձր ստանդարների արտադրանքներ ստեղծող երկիր դառնանք, միայն այն դեպքում կլինենք մրցունակ պետություն»:
Քաղաքագետ Անդրիաս Ղուկասյանը կարեւորեց` «Լեռնային Ղարաբաղի չճանաչված սահմանների պայմաններում» ԵՄ ասոցացման համաձայնագրի ընդունման արդյունքում հնարավոր բացերը, հարց բարձրացնելով, թե ինչպես դրանց պետք է վերաբերվի ԵՄ-ն: Եվրոինտերգրման պրոցեսի որպես թույլ կողմ նա նշեց այն, որ ԵՄ-ի հետ ինտերգրացիան չպետք է իրականացնի այն ուժը, որն օլիգարխիայի եւ կոռուպցիայի կրողն է, եւ հասարակության համար անընկալելի է, երբ այսպիսի իշխանության հետ են նստում բանակցելու եվրոպացիները:
Էմմա ԳԱԲՐԻԵԼՅԱՆ
