Ֆրանսիայում այցով գտնվող ԼՂՀ ԱԳ նախարար Կարեն Միրզոյանը հունիսի 12-ին հանդիպել է Ֆրանսիա-Արցախ Բարեկամության շրջանակի անդամների հետ ու քննարկել Բարեկամության շրջանակի գործունեության հնարավոր ուղղությունները և բնագավառները: Մասնավորապես, անդրադարձ է կատարվել քաղաքական, կրթական, մշակութային ոլորտներում Ֆրանսիայի և Արցախի միջև համագործակցության հեռանկարներին և հնարավորություններին:
Հանդիպմանը ներկա խորհրդարանականներն ընդգծել են միջազգային գործընթացներում Լեռնային Ղարաբաղի ընդգրկման կարևորությունը՝ որպես հիմնահարցի կարգավորման և տարածաշրջանում խաղաղության հաստատման կարևորագույն գործոն:
Նույն օրը Կարեն Միրզոյանը հանդիպում է ունեցել ֆրանսիական քաղաքագիտական շրջանակների ներկայացուցիչների հետ: «Պետականաշինությունը միջազգային ճանաչման բացակայության պայմաններում. Լեռնային Ղարաբաղի օրինակը» խորագրի ներքո կայացած հանդիպման ընթացքում ԼՂՀ ԱԳ նախարարը խոսել է Ադրբեջանի և Ղարաբաղի միջև հակամարտության, Արցախի ներկա իրավիճակի, խնդիրների, ձեռքբերումների մասին: Կարեն Միրզոյանը պատասխանել է ներկաների հարցերին:
Այցի շրջանակներում ԼՂՀ ԱԳ նախարարը հանդիպել է նաև Ֆրանսիայի հայ մամուլի ներկայացուցիչների հետ, հարցազրույցներ տվել ֆրանսիական լրատվամիջոցներին, այդ թվում նաև France 24 հեռուստաընկերությանը:
Կարդացեք նաև
ԼՂՀ ԱԳՆ մամուլի ծառայություն
