Ինչպես տեղեկացնում են Շիրակի մարզպետարանի տեղեկատվության և հասարակայնության հետ կապերի վարչությունից, Շիրակի մարզպետ Ֆելիքս Ցոլակյանի նախաձեռնությամբ այսօր խորհրդակցություն է անցկացվել Շիրակի մարզպետարանում, որին մասնակցել էին ՀՀ ջրային տնտեսության պետական կոմիտեի ներկայացուցիչները` նախագահ Անդրանիկ Անդրեասյանի ղեկավարությամբ, Գյումրու քաղաքապետ Սամվել Բալասանյանը, մի շարք համայնքապետեր:
Խորհրդակցության ընթացքում անդրադարձ է եղել «Հայջրմուղկոյուղի» ընկերության կողմից Գյումրիում իրականացված աշխատանքներին: Շիրակի մարզպետ Ֆելիքս Ցոլակյանը նշել է, որ ընկերության ներդրումային ծրագիրն իրապես աննախադեպ է ծավալային եւ գումարային առումներով, ինչը կնպաստի Գյումրու վաղուց արդեն մաշված ջրատար ցանցի թարմացմանը: «Սակայն համատեղ եւ փոխգործակցված աշխատանքի դեպքում հնարավոր կլինի շոշափելի արդյունքների հասնել»,-ասել է Ֆելիքս Ցոլակյանը: Շիրակի մարզպետն ու Գյումրու քաղաքապետը կարեւորել են ընկերության կողմից քանդված ասֆալտաշերտի վերականգնման հարցը, քանզի Գյումրիում այժմ ասֆալտապատումը համարվում է առաջնային խնդիրներից:
Ջրային տնտեսության պետական կոմիտեի նախագահը, անդրադառնալով այս բոլոր հարցերին, ընդգծել է, որ վարկային այս ծրագրով Գյումրիում բավական մեծ աշխատանքներ կիրականացվեն, դրանց որակն ու արագությունը վերահսկվում է պատկան մարմինների կողմից:
Կարդացեք նաև
Այնուհետեւ անդրադարձ է եղել հանդիպմանը ներկա 4` Մեծ Մանթաշ, Փոքր Մանթաշ, Գեղանիստ, Արեւշատ համայնքների ջրամատակարարման խնդիրներին: «Հայջրմուղկոյուղի» ընկերության սպասարկման տիրույթից դուրս գալու արդյունքում այս գյուղեր մուտք գործող ջուրը չի քլորացվում, դրանից բացի, գյուղեր հասնող ջրի քանակը եւս բավարար չէ: Քննարկվել է գյուղերի համար առանձին փոքր կարգավորող ջրամբար կառուցելու առաջարկը: Այս առումով համայնքապետերը պատրաստակամություն են հայտնել գրավոր առաջարկով դիմել պատկան ատյաններին:
ՇԻՐԱԿԻ ՄԱՐԶՊԵՏԱՐԱՆԻ ՏԵՂԵԿԱՏՎՈՒԹՅԱՆ ԵՎ ՀԱՍԱՐԱԿԱՆՈՒԹՅԱՆ ՀԵՏ ԿԱՊԵՐԻ ԲԱԺԻՆ
