Նա դատարանում չընդունեց իր մեղքը
1937 թ. ծնված, ազգությամբ հույն Բորիս Միխայլովին մեղադրանք էր առաջադրվել, որ նա 2009թ. հոկտեմբերին Ալավերդի քաղաքի իր բնակարանում հարեւանուհի Մ. Վ.-ի նկատմամբ կատարել է սեքսուալ բնույթի բռնի գործողություններ, որի արդյունքում վերջինս 2010թ. հունիսին ունեցել է աղջիկ երեխա: Նախկինում չդատված Բ. Միխայլովի նկատմամբ որպես խափանման միջոց էր ընտրվել չհեռանալու մասին ստորագրությունը: Լոռու մարզի առաջին ատյանի դատարանում Բ. Միխայլովն իրեն մեղավոր չի ճանաչել, ասելով, որ ինքն արդեն 10 տարի ունակ չէ սեռական հարաբերություններ ունենալու կամ սեռական բնույթի գործողություններ կատարելու: Կենսաթոշակառուն հայտարարել է, որ փորձում են այդ կերպ իրենից գումար շորթել:
Տուժողը դատարանում ցուցմունք է տվել, որ հարեւաններով մտերիմ հարաբերություններ ունեն , Բ. Միխայլովը հիվանդ կին ունի, որը խուսափում է լողանալ, երբ տանը մարդ չկա, այդ կնոջ խնդրանքով ինքը գնացել է Միխայլովի տուն: Մ. Վ.-ի վկայությամբ՝ երբ հիվանդ հարեւանուհին լողանում էր, կեսօրից հետո Բ. Միխայլովը հարբած վիճակում տուն է վերադարձել , ինքը ցանկացել է իրենց տուն գնալ, սակայն Միխայլովը փակել է տան դուռը եւ քաշելով իրեն տարել հյուրասենյակ, ուր բռնի սեռական գործողություն է կատարել: 2010թ. մայիսին Մ.Վ.-ի ինքնազգացողությունը վատացել է, հարազատները նրան տարել են բժշկական ստուգման, պարզվել է, որ նա 33 շաբաթվա հղի է:
Դատաբժշկի եզրակացությամբ՝ փորձաքննության պահին, հավանական է նաեւ՝ 2009թ.-ին, Բ. Միխայլովը սեռական ակտ կատարելու ունակ չի եղել, սակայն ունակ է եղել բեղմնավորելու, որ ծնված աղջկա նկատմամբ նրա հայրությունը գործնականում ապացուցված է: Ամբուլատոր դատահոգեբուժական եւ դատահոգեբանական համալիր փորձաքննության եզրակացություններով՝ Մ. Վ.-ն հոգեկան հիվանդությամբ չի տառապում, սակայն նրա մոտ հայտնաբերվել է «թեթեւ աստիճանի մտավոր հետամնացություն,արտահայտված դեբիլություն» հիվանդություն, սակայն նրա սակավամտությունն այն աստիճան չէ, որ նրան զրկեր գործի հանգամանքները ճիշտ ընկալելու եւ այդ մասին ճիշտ ցուցմունքներ տալու հնարավորությհունից:
Կարդացեք նաև
Հունիսի 3-ին Լոռու մարզի առաջին ատյանի դատարանի դատավոր Սուրեն Բաղդասարյանը վճռել է Բորիս Միխայլովին մեղավոր ճանաչել ՀՀ քրեական օրենսգրքի 139 հոդվածի 1-ին մասով(« Սեքսուալ բնույթի բռնի գործողությունները») եւ նրան դատապարտել 3 տարի ազատազրկման: Դատարանը վճռել է նրա նկատմամբ կիրառել «ՀՀ անկախության հռչակման 20-րդ տարեդարձի կապակցությամբ համաներում հայտարարելու մասին» ՀՀ Ազգային ժողովի 2011թ. մայիսի 26-ի որոշումը եւ նրան ազատել պատժից: Սույն դատավճիռը կարող է բողոքարկվել մեկամսյա ժամկետում:
Ոսկան ՍԱՐԳՍՅԱՆ
