Այսօր ԱԺ-ում քննարկվեց 2012-ի բյուջեի կատարման տարեկան հաշվետվությունը: Այն ներկայացրեց ֆինանսների նախարար Դավիթ Սարգսյանը, ինչի համար իր դժգոհությունը հայտնեց Նիկոլ Փաշինյանը:
Նրա խոսքերով` իրավիճակը բնորոշում է, երբ բյուջեի կատարողականը, որպես հիմնական զեկուցող ներկայացնում է մի մարդ, ով բյուջեի կատարման ողջ ընթացքում կառավարության անդամ չի եղել. «Սա հերթական անգամ ցույց է տալիս, որ բոլոր այն դեպքերում, երբ որ ԱԺ կանոնակարգը Տիգրան Սարգսյանին հնարավորություն է տալիս խուսափել հիմնական զեկուցողի կարգավիճակից, նա դա անում է: Կարելի է հասկանալ, թե ինչու է դա անում, որովհետեւ կռահում է, որ կան հարցեր, որոնց պատասխանելը նրա համար առանձնապես հեշտ չէ»:
Դավիթ Սարգսյանն առարկեց` ասելով, որ կանոնակարգն այնպիսին է, որ անգամ եթե ունենային լիովին նոր կազմով կառավարություն, այդ կառավարության նորանշանակ ֆինանսների նախարարը թե վարչապետը լիներ`պետք է տար հաշվետվություն նախորդ կառավարության գործունեության համար. «Այս առումով որեւէ զարմանալի բան չկա»:
Նիկոլ Փաշինյանը հիշեցրեց, որ պետբյուջեն ամենեւին էլ հաշվապահական թվերի գումարում-հանում չէ, երկրի թիվ մեկ ֆինանսա-քաղաքական փաստաթուղթն է եւ ադ փաստաթղթի իրականացման համար պատասխանատու է կառավարությունը` իր առաջին դեմքով: Նա հարց ուղղեց` «Կառավարության անդամները պետական բյուջեից ստանում են աշխատավարձ, եւ մենք յուրաքանչուրս իրավունք ունենք իմանալ, թե ինչով ենք նրանք զբաղվում` երկրի տնտեսությունը ջղանացած տեմպերով «զարգացնելուց» ազատ ժամանակահատվածում: Կարո՞ղ եք արդյոք պարզաբանել տեղեկությունները հանրահայտ օֆշորային սկանդալի մասին: Տեղեկություններ հրապարակվեց, որ Տիգրան Սարգսյանը Նավասարդ Կճոյանի եւ երրորդ անձի հետ օֆշորային գոտում բացել է հաշվեհամար, որի արդյունքում ՀՀ բանկերից մեկի կողմից տրված տասը մլն դոլարի վարկը ըստ էության անհայտ վիճակում է հատնվել: Մամուլում տեղեկություններ կան, որ այդ միջնորդության գործում Տիգրան Սարգսյանը անձամբ է դերակատարություն ստանձնել, եւ գումարների մի մասն էլ հետ են վերադարձրել բանկ: Ընդհանրապես դա շատ կասկածելի գործարք է, որը, կարծում եմ, ուղղակի հարցականի տակ է դնում ոչ միայն կառավարության օրինական հանձնառությունը ծառայել ՀՀ ժողովրդին, այլեւ անձամբ Տիգրան Սարգսյանի հանձնառությունը»:
Կարդացեք նաև
Դավիթ Սարգսյանը պատասխանեց, որ նույն ադ մամուլում կարող էիք գտնել նաեւ կառավարության համապատասխան պաշտոնական պարզաբանումները, որ ադ տեղեկությունները չեն համապատասխանում իրականությանը, հերյուրանք են, սուտ են. «Համապատասխանորեն ՀՀ վարչապետը դիմել է իրավապահ մարմիններին` պարզաբանելու, թե ինչպես են այդ տեղեկությունները ստացվել»:
Նիկոլ Փաշինյանն արձագանքեց. «Հենց պրոբլեմը դրանում է, որ փոխանակ դատախազությունը դիմեր Տիգրան Սարգսյանին, Տիգրան Սարգսյանն է դիմում դատախազությանը, որ հնարավորություն ունենա այսօր ինձ ասել, որ գիտեք ինչ, դիմել եմ դատախազությանը, դատախազությունը զբաղվում է: Մենք ունենք բազմաթիվ դեպքեր`սկսած Մարտի մեկից վերջացրած այլ հարցերով, որ դատախազությունը հարցերի պատասխանը չի տվել: Փորձը ցույց է տալիս, որ ՀՀ պետական պաշտոնյաները դիմում են ընդամենը նրա համար, որ հարցերին պատասխանելու անհրաժեշտություն լինելու դեպքում ասեն՝ գիտեք ինչ, մենք արդեն դիմել ենք դատախազությանը: Իրենք տասը տարի կզբաղվեն, քսան տարի կուսումնասիրեն, հետո կգան կպարզաբանեն»:
Նիկոլ Փաշինյանը վստահեցրեց, որ հանրությունն անձամբ Տիգրան Սարգսյանից է ուզում ստանալ այդ հարցերի պատասխանները, ընդ որում ոչ թե ընդհանրական պատասխաններ, այլ այդ հոդվածում բերված բոլոր դետալներին վերաբերվող:
Հռիփսիմե ՋԵԲԵՋՅԱՆ
