Այսօր ԱԺ փոխնախագահ Էդուարդ Շարմազանովը հայտարարությունների ժամին անդրադարձավ Իլհամ Ալիեւի քննադատությանը՝ ուղղված Հայաստանին:
Նա ասաց, որ երբ մեր ընդդիմությունը քննադատում է, հասկանալի է, որովհետեւ հայոց ընդդիմությունը քննադատում է ոչ թե սեւացնելու, այլ ուղղելու, օժանդակելու, օգնելու նպատակով. «Բայց երբ դրա մասին խոսում Արցախից Արեւելք ընկած երկրների ներկայացուցիչները, սա արդեն նմանվում է կրկեսի: Գործը հասել է նրան, որ պաշտոնական Բաքուն հայտարարում է, որ Հայաստանի եւ Ադրբեջանի միջեւ անդունդ է եւ զարգացման անդունդը ավելանալու է եւ դա իրենց նպատակն է: Իհարկե, անդունդը պետք է մեծանա: Բաքուն քարոզում է ֆաշիզմ եւ ռասիզմ, Երեւանը քարոզում է հանդուրժողականություն, Բաքվում քարոզում են պատերազմ, Երեւանում քարոզվում է խաղաղություն, Բաքվում բռնապետություն է, Երեւանում ժողովրդավարություն, Բաքվում խոսքի ազատությունը ֆանտաստիկայի ժանրից է, Երեւանում իրականություն: Ուզեն, թե չուզեն, սա է: Իսկ ինչ վերաբերում է մեր երկրի առջեւ ծառացած հիմնախնդիրներին, ապա եւս մեկ անգամ պիտի նշեմ, որ դրանք շատ կարեւոր են: Պատահական չէ, որ անվտանգության խորհրդի նիստին ՀՀ ղեկավարը երկու հստակ ուղերձ հղեց թե՛ հասարակությանը, թե՛ առաջին հերթին իշխանություններին, որ ժողովրդավարական ինստիտուտները պետք է զարգացնենք եւ ոլորտ առ ոլորտ վերափոխենք տնտեսությունը: Ովքեր որ մտածում են, որ Հայաստանի եւ Ադրբեջանի միջեւ անդունդը պետ է ավելանա, իրոք, որ պետք է ավելանա»:
Իր ելույթը Էդուարդ Շարմազանովը եզրափակեց` մեջբերում անելով իր տատիկից. «Ինչպես որ կասեր տատս, դուք ձեր դարդը լացեք»:
Կարդացեք նաև
Հռիփսիմե ՋԵԲԵՋՅԱՆ
