Գառնիկ Օհանյանը չի պատրաստվում վճարել տուգանքները
Ներկայացրել ենք, որ Իջեւանի քաղաքապետարանը Իջեւանի շուկայի տնօրեն Գառնիկ Օհանյանին տուգանել է բացօթյա անօրինական առեւտուր կազմակերպելու, շուկայի առաջնամասում ապօրինի շինարարություն իրականացնելու համար: Շուկայի տնօրեն Գառնիկ Օհանյանն ասաց, որ բացօթյա առեւտրի հետ ինքը կապ չունի, քանզի, ըստ օրենքի, բացօթյա առեւտրի համար տարածք հատկացնում է համայնքապետարանը, այնտեղ վաճառվում են միայն որոշակի տեսակի ապրանքներ ՝ պաղպաղակ, հյութեր, ծաղիկ եւ այլն: Նա հայտնեց, որ ինքը շուկայի առաջնամասում շինարարությունն ապօրինի չի կատարել, քանի որ դրա համար կան ճարտարապետահատակագծային առաջադրանք, նախագիծ, շինթույլտվություն: Գառնիկ Օհանյանն ասաց, որ վարչական դատարան է բողոքարկել ապօրինի շինարարության համար իրեն 200 հազար եւ 2.5 միլիոն դրամ տուգանելու քաղաքապետարանի որոշումները:
Գ. Օհանյանի վկայությամբ՝ մոտ 10 օր առաջ Իջեւանի քաղաքապետարանի շենքի դիմաց բողոքի ակցիա են իրականացրել Իջեւանի շուկայի առաջ առեւտուր կատարող քաղաքացիներ, որոնց մի մասը քաղաքապետարանի կողմից տուգանվել է: Մի խումբ իջեւանցիներ դժգոհել են, որ Իջեւանի եկեղեցու շրջակա տարածքը բացօթյա շուկայի է վերածվել, իրենք սոցիալական ծանր պայմաններում են ապրում, իսկ քաղաքապետարանը հնարավորություն չի տալիս գոյատեւելու:
Ոսկան ՍԱՐԳՍՅԱՆ
