Բանաստեղծ Մերուժանը իր հերթական՝ «Իմ բուրվառից» ժողովածուով է ներկայանում ընթերցողին: Նկատենք, որ դրանց մեծ մասի կազմին զետեղված է նույն կնոջ լուսանկարը: Այս առիթով բանաստեղծն «Առավոտին» ասաց. «Նրան, ում լուսանկարով են իմ ժողովածուները, այսօր նույն պատվին եմ արժանացնում, համոզված լինելով, որ սերն այնժամ է հիշարժան, երբ նրանում տեղ չունեն հաշվենկատ հարաբերությունները: Սերը խղճի զավակն է, որն առաջնորդվում է բնազդով եւ, հասկանալով՝ դառնում է կրոն կամ պաշտամունք: Իսկ սիրո ներկայացուցիչը՝ սեռական ու բարոյական կարողություններով թագադրված անհատականություն: Թող երիցս օրհնաբանվեն ճակատագրից շոյված կանայք եւ նույնքան սիրվեն անտեսվածները, որոնք ժամանակի բերմամբ մի օր կհասկացվեն…»:
Մերուժանը խոսելով ժողովածուի մասին, նշեց. «Ի մի բերելով տպագրված ու անտիպ քառյակներս, նպատակ ունեմ չորս տողով ներկայացնել մի բանաստեղծական աշխարհ, որտեղ գեղարվեստական պատկերը զուգորդվում է գեղագիտական խոսքի փիլիսոփայական աշխարհընկալմամբ: Ահա թե ինչու այս ժողովածուն վերնագրեցի «Իմ բուրվառից», քանզի այն ամփոփում է ծխացող խնկի բուրմունքը, որի միջոցով տարածվում է Աստծո փառքը երկրի վրա եւ մարդկանց հոգիներում»:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
