Շուկայի տնօրենին տուգանել են 2.5 միլիոն դրամով
Նախկինում հայտնել ենք Իջեւանի քաղաքապետարանի եւ Իջեւանի շուկայի տնօրինության հակամարտության մասին: Իջեւանի նախկին քաղաքապետ Վարուժան Ներսիսյանը շուկայի առաջնամասում կառուցապատում իրականացնելու շինթույլտվություն էր տվել: Իջեւանի քաղաքապետ Վարդան Ղալումյանն ասաց, որ իրենք առ ոչինչ են համարել այդ շինթույլտվությունը: Իջեւանի շուկայի տնօրինությունը քաղաքապետարանի այդ որոշման դեմ հայց է ներկայացրել վարչական դատարանի Սեւանի նստավայր: Վարչական դատարանը մերժել է շուկայի տնօրինության հայցը, վերջինս վերաքննիչ բողոք է ներկայացրել: Վարդան Ղալումյանի խոսքերով՝ վերաքննիչ դատարանը համարել է, որ քաղաքապետարանն իրավունք չուներ շինթույլտվությունն առ ոչինչ համարելու, այն կարող էր անվավեր համարել: Իջեւանի քաղաքապետն ասաց, որ դրանից հետո իրենք քաղաքապետարանի կողմից նախկինում տրված շինթույլտվությունն անվավեր են համարել:
Վարդան Ղալումյանը տեղեկացրեց, որ ապօրինի շինարարության համար քաղաքապետարանը շուկայի տնօրեն Գառնիկ Օհանյանին տուգանել է 200 հազար, ապա՝ 2.5 միլիոն դրամի չափով: Քաղաքապետարանը չնախատեսված վայրում բացօթյա առեւտուր կազմակերպելու համար 6-7 անգամ տուգանել է Գառնիկ Օհանյանին, սկզբում՝ 20-30 հազարի չափով, վերջին 4 անգամը՝ 100 հազարական դրամի չափով: Քաղաքապետի խոսքերով՝ նշանակված տուգանքներից Գառնիկ Օհանյանը միայն մեկն է վճարել՝ 20 հազար դրամի չափով:
Վ. Ղալումյանը հայտնեց, որ ապօրինի շինարարության կապակցությամբ ինքը դիմել է ոստիկանություն եւ ներկայումս Տավուշի քննչական բաժնում ՀՀ քրեական օրենսգրքի 315 պրիմ հոդվածով քննություն է կատարվում: Քաղաքապետն ասաց, որ շուկայի հետնամասում մոտ 6 տարի առաջ ապօրինի կառույց է կառուցվել, փորձ է արվել այն որպես նոր շինարարություն ներկայացնել: Վ. Ղալումյանին հարցրինք մոտ 10 օր առաջ քաղաքապետարանի շենքի առաջ տեղի ունեցած բողոքի ակցիայի մասին, որը նկարահանվել եւ ցուցադրվել է տեղական՝ «Իջեւան ստուդիա» հեռուստաընկերությամբ: Քաղաքապետն ասաց, որ դրան մասնակցել են 7 հոգի, ովքեր շուկայի առաջ առեւտուր են կատարում: Մենք ցանկացանք այս հակամարտության վերաբերյալ ներկայացնել նաեւ շուկայի տնօրեն Գառնիկ Օհանյանի տեսակետը, սակայն նրա բջջային հեռախոսահամարը չէր պատասխանում:
Կարդացեք նաև
Ոսկան ՍԱՐԳՍՅԱՆ
