Ինչպես հայտնի է, մի քանի օր առաջ մոտ 10 միլիոն դրամ յուրացում կատարելու մեղադրանքով ձերբակալվել է Շիրակի մարզի Հովունի գյուղի 17 տարվա գյուղապետ Թելման Միրիջանյանը: Նա, ըստ քրեական գործի, բնակիչներից 3 մլն 200 հազար դրամի հողահարկ է գանձել, սակայն այն գյուղապետարանի բյուջե չի մուտքագրել, ավելին, կեղծ փաստաթղթերի միջոցով գյուղապետարանի դրամարկղից ելքագրել ու յուրացրել է 6մլն 200 հազար դրամ: Նշենք սակայն, որ համագյուղացիները պնդում էին, որ նա տանը ոչինչ չունի ու իրենց համար անհայտ է, թե ի՞նչ է արել այդ գումարը գյուղապետը: Գյուղացիներից շատերը նաև ասում էին` եթե Թելման Միրիջանյանը վատ մարդ ու գյուղապետ լիներ, ապա 17 տարի շարունակ չէր ընտրվի իրենց կողմից:
Aravot.am-ի հետ զրույցում 17 տարվա գյուղապետի յուրացումների մասին իր զարմանքը հայտնեց նաև Շիրակի մարզպետարանի տարածքային վարչության պետ Կարլեն Աբրահամյանը: «Մեզ համար իրոք անակնկալ էր, թերևս հնարավոր է , բայց էլի եմ ասում, ուղղակի ապշեցուցիչ է, որովհետևս ահռելի գումարի մասին է խոսքը: Մինչև քննչական մարմինը մեզ պաշտոնական գրություն չուղարկի, չեմ կարողանա գաղափար կազմել, թե ի՞նչ է յուրացրել գյուղապետը, էնտեղ միայն հող կա, հողահարկ պիտի գանձած լինի, օբյեկտներ էլ չկան, որ ասեմ գույքահարկ գանձի կամ վարձակալությամբ տա ու գումարներ յուրացնի»,- ասաց մարզպետարանի պաշտոնյան:
Մեր այն հարցին, թե ինչպե՞ս է գյուղի եկամտահարկը հավաքել գյուղապետը, Շիրակի մարզպետարանը գո՞հ է նրա աշխատանքից, մարզպետարանի պաշտոնյան ասաց. «Դուք չգիտե՞ք, որ նրանք, ովքեր վատ են աշխատում, մենք սեղմում ենք, ստիպում ենք, որ աշխատի: Նրան էլ, այսպես ասած, դեմ ենք տվել պատին ու Հովունու բյուջեի կատարողականը հասել է 60-70%-ի: Նա սուսիկ-փուսիկ անձ է, ոնչնով չի սիրել երևալ, երևի ինքը խնդիրներ է ունեցել օրգանների հետ, իսկ մենք հիշեցրել ենք, որ սա է քո գործը, ու հիմա հանկարծ իմանում ես, որ նման կարգի յուրացում է կատարել …»,- մի տեսակ կասկածամտորեն ասաց տարածքային վարչության պետը:
Նունե ԱՐԵՎՇԱՏՅԱՆ
