«Փակ շուկայի» տարածքում քաղաքապետարանի կողմից նախօրեին կատարված ապամոնտաժման աշխատանքները «Փրկենք փակ շուկան» նախաձեռնության անդամ Գեւորգ Սաֆարյանի համար անհասկանալի են:
«Հստակ չի ներկայացվում՝ այդ աշխատանքներն ինչ ֆինանսներով են անում, քաղաքային բյուջեի՞ց է արվում, թե՞ շինարարն է վճարելու: Եթե քաղաքային բյուջեից է արվում, ինչու պետք է շինարարի սխալի, Սամվել Ալեքսանյանի արածի համար քաղաքային բյուջեից գումարներ դուրս գան»,- մեզ հետ զրույցում ասաց Գ. Սաֆարյանը:
Նրա խոսքերով. «Քաղաքապետարանից ասում են՝ ապամոնտաժումը վերեւի մասին է վերաբերում, բայց ներսի մասն էլ է ապօրինի շինարարություն արվում, կամարները քանդվել են, ներսում ապօրինի կառույց է, այն եւս պետք է քանդվի, բայց ոնց տեսնում ենք՝ սրա մասին խոսք չկա քաղաքապետարանի ղեկավարության կողմից: Հասկանալի չէ, քաղաքապետարանի գործողությունները»:
Այն, որ քաղաքապետարանը «Փակ շուկայի» տարածքում ապամոնտաժման աշխատանքներ է արել՝ շինարարություն իրականացնողին սեփական ուժերով խախտումը վերացնելու մասին զգուշացնելուց հետո, Գ. Սաֆարյանին դուր չի գալիս. «Սամվել Ալեքսանյանը արհամարհում է մեր պետական ապարատը, ու դա նորություն չէ: Նրանք նախազգուշացրել են, ու կառուցապատողը չի ենթարկվել, այս դեպքում կառուցապատողը պետք է պատժի ենթարկվեր՝ վճարելով ոչ միայն իրենց կողմից ապամոտնաժման համար, այլեւ՝ տուգանքներ: Այստեղ նաեւ քրեական գործի մասին է խոսքը, մեր օրենսգրքում կա վանդալիզմ հոդված , որը լիովին համապատսխանում է այդ գործողությանը: Բայց ինչ է ստացվում, Ալեքսանյանին չեն դատում, նա անտեսում է պետական ապարատը, չի վճարում քաղաքապետարանի գործողության համար, սա լպիրշություն է»:
Կարդացեք նաև
Արփինե ՍԻՄՈՆՅԱՆ
