Չնայած ՀՀ կառավարության անտարբերությանը` լոռեցիներին ձեռք է մեկնել «Տաշիր» բարեգործական հիմնադրամը:
Նախնական տվյալներով, այս տարվա մայիսի 25-ին Լոռու մարզի երեք` Ագարակ, Ամրակից եւ Լեջան համայնքներում տեղացած կարկուտի պատճառած վնասը գնահատվել է 227 միլիոն ՀՀ դրամ:
Այդ մասին Aravot.am-ին հայտնեցին ՀՀ Լոռու մարզպետարանի աշխատակազմի գյուղատնտեսության եւ բնապահպանության վարչության գյուղատնտեսության բաժնից` մանրամասնելով, որ ընդհանուր առմամբ վնասվել է 548 հա հողատարածք:
Եվ չնայած ՀՀ կառավարությունը տուժած բնակիչներին օժանդակություն չի տրամադրել, այնուամենայնիվ, «Տաշիր» բարեգործական հիմնադրամը, Կարեն և Սամվել Կարապետյանների գլխավորությամբ, հոգացել է նրանց կրած վնասը:
Կարդացեք նաև
«Թեեւ ամեն տարի մեզ մոտ կարկուտ է տեղում, սակայն, քանի որ այս տարվա ավերածությունները աննախադեպ էին, դիմեցինք հիմնադրամին, նրանք էլ պատրաստակամություն հայտնեցին օժանդակել»,-Aravot.am-ի հետ զրույցում ասում է ՀՀ Լոռու մարզպետի տեղակալ Տիգրան Բադոյանը:
Ըստ նախնական համաձայնության` այն համայքներում, որտեղ կարկուտի հետևանքով տուժել են կարտոֆիլի ցանքատարածությունները և ենթակա են վերականգնման՝ կտրվի անհրաժեշտ քանակությամբ պարարտանյութ, իսկ հացահատիկի վնասված և այլևս չվերականգնվող ցանքատարածությունների հողի հարկն ամբողջությամբ կվճարի հիմնադրամը:
Պարարտանյութի համար նախատեսված գումարներն արդեն իսկ փոխանցված են:
Անուշ ԲՈՒԼՂԱԴԱՐՅԱՆ
