«Հայկական իրականության մեջ հասարակությունը շատ պասիվ դիրքորոշում ունի բանակում մարդու իրավունքների ոտմահարման, բռնությունների դեպքերի վերաբերյալ, հասարակական պահանջարկ խնդրի լուծման ուղղությամբ չկա»,-այդ մասին Aravot.am-ի հետ հարցազրույցում ասում է «Խաղաղության երկխոություն» հ/կ նախագահ Էդգար Խաչատրյանը:
Նա կարծում է, որ բանակում տիրող իրավիճակի պատճառները տարբեր են` սկսած ՀՀ-ում տիրող գողական բարքերից, օրենսդրական բացերից մինչեւ ՀՀ իշխանությունների` խնդրին լուծում տալու շահագրգիռ չլինելուց:
«Բացի վերոնշյալները` այսօր ՀՀ-ի բոլոր ոլորտներում օրենքը գերագույն արժեք չէ, իսկ այն պարագայում, երբ օրենքը չի աշխատում, մնացած ոլորտներում էլ արդարադատությունը չի աշխատում, ուստի զինվորը, ում իրավունքները ոտնահարված են, չի կարողանում արդարության հասնել: Ավելին, զինվորի նկատմամբ`որպես քաղաքացու, հարգանք չկա, այսինքն` քանի որ քաղաքացու, անհատի նկատմամբ հարգանք չկա հասարակության մեջ, նույն իրավիճակը ձեւավորվում է բանակում»,-ասում է Էդգար Խաչատրանը` բարձրաձայնելով, որ ցանկացած իրավագիտակից հասարակության համար միայն այս տարվա տվյալներով ոչ մարտական իրավիճակներում 14 զինծառայողի մահն արդեն ահազանգ է:
Բանակում մարդու իրավունքների ոտնահարման, բռնությունների դեպքերը նվազեցնելու համար էլ Էդգար Խաչատրյանի ղեկավարած կազմակերպությունը այս տարվա սկզբից իրականացնում է «Ապահով զինվորներ`անվտանգ Հայաստանին» ծրագիրը:
Կարդացեք նաև
«Բանակում ոչ մարտական իրավիճակներում մահացած զինվորների թիվը դրդեց ծրագրի իրականացմանը: Վերնագիրն ընդգծում է, որ անվտանգ Հայաստան նշանակում է ապահով զինվորներով Հայաստան: Երբ մենք խոսում ենք ուժեղ բանակի մասին, նշանակում է մենք խոսում ենք մի բանակի մասին, որտեղ զինվորների քաղաքացիական իրավունքները պաշտպանված են, որտեղ մինիմումի են հասցված բռնությունները, դա է մեզ համար անվտանգ Հայաստանը, մենք ուզում ենք հասնել դրան»:
Ծրագրի շրջանակներում էլ այսօր տեղի ունեցավ «Արդարադատարան» խաղ-քննարկումը:
«Որոշեցինք հենց դատական գործընթացով ներկայացնել բանակում առկա խնդիրները»,-ասում է Էդգար Խաչատրյանը` տեղեկացնելով, որ ծրագրի շրջանակներում կազմակերպվող միջոցառումները շարունակական բնույթ են կրելու` ընդգրկելով նաեւ ՀՀ այլ քաղաքներ:
«Հիմնական նպատակը կլինի հանրային իրազեկումը այդ խնդիրների վերաբերյալ, քանի որ մենք շահագրգռված ենք, որ այդ խնդիրների լուծման ուղղությամբ քաղաքացիական հասարակական պահանջարկ ձեւավորվի: Բացի այդ`ստեղծելու ենք ինտերնետային կայք, որտեղ զինվորներին հնարավորություն ենք տալու էլեկտրոնային միջոցներով ահազանգել բանակում իրենց ունեցած խնդիրների վերաբերյալ»,-հետագա անելիքների մասին է պատմում «Խաղաղության երկխոսություն» հ/կ նախագահը:
Անուշ ԲՈՒԼՂԱԴԱՐՅԱՆ
