«Հայկական Փի Ար ասոցիացիա» գիտատեղեկատվական հ/կ-ի նախագահ, բանասիրական գիտությունների թեկնածու Աստղիկ Ավետիսյանի կարծիքով, նոր մեդիան հնարավորություն է ընձեռել, որ ավելի շատ լրատվական կայքեր գործունեության ծավալեն, սակայն, այս հանգամանքը չի նպաստել, որ բարձրանա տեղեկատվության որակն ու հավաստիությունը:
«Այն տեղեկատվությունն, որը պետք է դաստիարակչական գործառույթ ունենա, մենք դեռեւս չունենք: Ինչ է մեր եթերում տեղի ունենում. հիմնական եթերները, որոնք ավելի մեծ լսարան ունեն, հիմնականում սերիալային մակարդակը դեռ չեն փորձել հաղթահարել»,- ասաց Ա. Ավետիսյանն, ով նաեւ ԵՊՀ լրագրության ֆակուլտետի դասախոս է եւ մասնագիտական աչքով է հետեւում կատարվող իրադարձություններին եւ դրանց լուսաբանմանը:
«Երբ առավոտից երեկո հետեւում ես տեղեկատվությանը, զգացողություն է առաջանում, որ մեր երկրում որեւէ դրական բան տեղի չի ունենում: Արդեն տեղեկատվության լավն ու վատը, առաջնայինն ու երկրորդայինը չեն զանազանվում»,- նշեց բանախոսն ու հավելեց, որ լրատվական կայքերից, թերթերից ու սոցիալական ցանցերից ստացած տեղակատվության հորձանուտում մարդը պարզապես կարող է խճճվել:
Տիկին Ավետիսյանն անդրադարձավ նաեւ վերջին օրերին ամենքննարկվող թեմային` Սյունիքի նախկին մարզպետ Սուրիկ Խաչատրյանի տան մոտ տեղի ունեցած միջադեպին: Ըստ նրա` այդ դեպքում էլ լրատվամիջոցներից ստացվող տեղեկատվությունն անկողմնակալ համարել չի կարելի:
Կարդացեք նաև
«Ես, իհարկե, չեմ արդարացնում Սուրիկ Խաչատրյանին, բայց բարոյական մարդն իրավունք չուներ զենքով հայտնվել նրա տան մոտ: Նա ի՞նչ իրավունք ուներ գիշերվա կեսին զենքով հայտնվել մարզպետի տան մոտ: Կարծես, թե ոչ մեկ այս մասին չխոսեց»,- ասաց Ա. Ավետիսյանը` նկատելով, որ հեռուստաընկերությունները չպետք է հրապարակեին համացանցում հայտնված միջադեպի տեսանյութը:
Իսկ ասուլիսին ներկա հոգեբան Աննա Բադալյանի խոսքով, նույնիսկ ամենահավասարակշռված մարդու համար բացասական ինֆորմացիան կարող է անցանկալի երեւույթների հանգեցնել ու անհատին կտրել հասարակությունից` նրան գցելով ապատիայի մեջ:
Աշոտ ԱԹԱՅԱՆ
