«Սա քաղաքական շարժում չէ, ավելի շատ քաղաքացիական շարժում է: Շարժման մեջ ներգրավված են տարբեր սոցիալական խմբեր, իսկ շարժիչ ուժը հիմնականում երիտասարդությունն է, որոնց մեջ կան նաեւ գլխաշորով երիտասարդներ, այսինքն նրանց մեջ կան նաեւ մահմեդական երիտասարդներ: Սա այն պոտենցիալն է, որը վաղվա Թուրքիայում կարող է նոր մթնոլորտ ձեւավորել»,-այսօր «Տեսակետ» ակումբում անդրադառնալով Թուրքիայում տեղի ունեցող իրադարձություններին՝ ասաց թուրքագետ Անուշ Հովհաննիսյանը:
Բանախոսի փոխանցմամբ` կուսակցությունները, որպես քաղաքական ուժեր որեւէ հայտարարությամբ հանդես չեն եկել, սակայն դրանց ներկայացուցիչները հանդես գալով որպես քաղաքացի եւ ոչ թե կուսակցության անդամ, ներկա են գտնվել շարժմանը: «Ամբողջ արեւելյան քրդական վիլայեթները չեն ցուցաբերել ակտիվություն: Քրդամետ կուսակցությունը ակտիվ չի մասնակցում շարժմանը, սակայն առանձին գործիչներ հանդես են եկել»:
Քաղաքագետը նշեց, որ Էրդողանը 2 օր առաջ ժամանելով Ստամբուլ, հանդես եկավ ելույթով, որտեղ հստակ երեւում էր, որ նա չի պատրաստվում հետքայլ կատարել. «Էրդողանի եւ Գյուլի միջեւ տարաձայնություններ կան: Գյուլի հայտարարությունը հակասում է Էրդողանի գաղափարներին եւ այս խմորումները լավ բանի հանգեցնել չեն կարող, որտեղ կան տարաձայնություններ անգամ անձնական մակարդակով»:
Ըստ Հովհաննիսյանի` նրանց տարաձայնությունները դեռ բացահայտվել էին թուրք-հայկական գործընթացի ժամանակ, երբ Էրդողանը շատ արագ տապալեց այդ գործընթացը՝ համարելով, որ այն Գյուլի նախաձեռնությունն է, այլ ոչ թե իրենը: Բանախոսը կարծում է, որ սա կուսակցության փլուզման չի բերի, բայց որոշակի պառակտումներ արդեն ակնհայտ են:
Կարդացեք նաև
Քաղաքագետը նշեց նաեւ, որ այսօրվա շարժումը փորձում են կասեցնել եւ շարժման սլաքն այլ ուղղությամբ տանել. «Էրդողանի շուրթերից հնչեց դավադրություն բառը, ակնարկելով` արտաքին ուժերի գործոնը, նկատի ունենալով Սիրիային: Ակտիվորեն ԱԶԿ-ական ԶԼՄ-ների կողմից փոքրիկ արտահոսքեր են լինում, թե Թուրքիայի լավը ովքեր չեն ուզում, որտեղ մատնանշվում են հայկական «Ակօս» եւ հրեական «Շոլոմ» թերթերը, որոնք առաջին աշխարհամարտի ժամանակ հարվածեցին Թուրքիային թիկունքից: Այսպիսի ոգով են փորձում պառակտել շարջումը, պառակտել շարժման մասնակիցներին»,-ընդգծեց թուրքագետը:
Նա նաեւ նշեց, որ ԱԶԿ-երի ընտրությունների հետ կապված չեն բացառել, որ խորհրդարանական ընտրությունները կմիավորեն ՏԻՄ ընտրությունների հետ: «Թուրքիայում ինչ բախումներ եւ շարժումներ լինեն, դրանից տուժում են միայն ազգային փոքրամասնությունները: Թուրքիան բավական բարդ երկիր է եւ մեր դիրքորոշումը պետք է լինի ուշիուշով հետեւելը այդ քաղաքական զարգացումներին եւ չգնալ պարզ մոտեցումների»: Շարժումը դեռ շարունակվում է. կիրակի օրը սպասվում է երիտասարդ ազգայնականների երթը:
Քրիստինա ՄԻՐԶՈՅԱՆ
