Նախարարը Ա. Բուդաղյանի հետ կատարվածը համարում է միջանձնային հարաբերությունների հետեւանք:
Հունիսի 7-ին Նոյեմբերյանի սահմանագոտի այցելության ժամանակ պաշտպանության նախարար Սեյրան Օհանյանը Ոսկեպարում մամլո ասուլիս տվեց: Դրա ընթացքում հարց տրվեց նաեւ Գորիսում գնդապետ Արտակ Բուդաղյանի վրա կրակելու վերաբերյալ, որ այն վերջին տարում երկրորդ դեպքն է, երբ քաղաքացիական անձը հարձակում է գործում սպայի վրա, արդյոք դա կապ չո՞ւնի հասարակության մեջ զինվորականի կերպարի անկման հետ:
Նախարարն ի պատասխան ասաց. «Երեկ եմ այցելել Արտակ Բուդաղյանին, որովհետեւ գտնվում էի հանրապետությունից դուրս: Ես իր հետ կարճ զրուցել եմ դեպքի վերաբերյալ եւ չեմ ծանրաբեռնել, որովհետեւ վիրավոր վիճակում է գտնվում, այսօր համապատասխան պատկան մարմինները, իրավապահ մարմինները զբաղվում են: Մենք, ընդհանուր առմամբ, ես՝ որպես անձ, եւ մենք՝ զինված ուժերի ղեկավարությունս դատապարտում ենք ցանկացած միջանձնային այդպիսի ելքով դեպքեր: Դատապարտում ենք ոչ միայն զինվորականի եւ քաղաքացիականի միջեւ վեճը կամ կռիվը կամ այդպիսի ելքով դեպքերը, այլ նաեւ՝ քաղաքացիների միջեւ, ազատ կյանքում դեպքերը: Մենք այնքան սպառնալիքներ եւ մարտահրավերներ ունենք դրսից, մեզ հայտնի, մեզ նայող, ոչ լավը ցանկացող հարեւան պետությունների կողմից,որ ներսում մենք պետք է մշտապես ձգտենք միասնական լինել, եւ այդպիսի վեճերը պետք է ավարտվեն խոսքով: Եվ իհարկե մենք դատապարտում ենք այն ոտնձգությունները, որոնք կատարվում են զինծառայողների՝ զինվորների եւ բարձրաստիճան սպայական կազմի նկատմամբ : Գտնում եմ, որ այս դեպքը տեղի է ունեցել միջանձնային հարաբերությունների խախտման արդյունքում, պահի ընթացքում ծագած: Եվ չեմ կարծում, որ այս դեպքը նրա արդյունք է, որ զինվորականի կեցվածքի անկում կամ զինվորական համազգեստի անկում գոյություն ունի: Այսօր մեր հայոց բանակի սպաները եւ զինվորներն այնպիսի խնդիրներ են կատարում, որոնք գնահատելի են: Իրականում հայոց բանակի սպան, հայոց բանակի զինվորը դա հերոսական մասնագիտություն է : Ինչու եմ ասում՝ հերոսական, որովհետեւ ամեն վայրկան առնչվում են վտանգի , դժվարությունների, զինվորական սահմանափակումների հետ»:
Կարդացեք նաև
Ոսկան ՍԱՐԳՍՅԱՆ
