«Գյուղնախարարությունը չունի իրավասություններ գյուղատնտեսությունն ամբողջությամբ կառավարելու համար. Մենք կրկին նույն խնդրին ենք հանգում»,- այսօր ԱԺ գյուղատնտեսական եւ բնապահպանական հարցերի մշտական հանձնաժողովի նիստում 2012 թվականի գյուղատնտեսության նախարարության բյուջեի կատարողականի քննարկման ժամանակ կարծիք հայտնեց ԲՀԿ խմբակցության պատգամավոր Լյովա Խաչատրյանը:
Հիշեցնենք, որ հաշվետվությունը բյուջեի կատարողականի ժամանակ ներկայացրել էր փոխնախարարը, պատգամավորները հրաժարվեցին նրան հարցեր տալ`պատճառաբանելով, որ իրենց հարցերին սպառիչ պատասխաններ կտա միայն գյուղատնտեսության նախարարը, ով այդ օրը ինչ-որ պատվիրակության հետ էր զբաղված ու չէր ներկայացել խորհրդարան:
Մինչ Լյովա Խաչատրյանի ելույթը, մեկ այլ ԲՀԿ-ական պատգամավոր`Վահագն Մախսուդյանը դիմել էր գյուղատնտեսության նախարար Սերգո Կարապետյանին`ասելով. «Ձեր հայրենասիրությունը, ձեր մարտական տրամադրվածությունը չի կարողանա արդյունքների բերել, քան համակարգային փոփոխությունները, լավ է, որ ասեցիք, որ գյուղատնտեսության մասին օրենքը կբերվի խորհրդարան»:
ԲՀԿ-ական պատգամավորի հարցն էլ վերաբերվում էր գյուղատնտեսության ոլորտում արտասահմանյան դրամաշնորհային ծրագրերին, որոնք հիմնականում թերակատարվել են: «Եթե գյուղնախարարությունը հռչակել ենք գերակա, ուրեմն որոշակի արտոնություններ պիտի տանք: Թե չէ մենք մեր հնարավորությունները թողած հույսներս դրել ենք արտասահմանյան դրամաշնորհների վրա, որոնք հիմնականում թերակատարվում են»,- բարկացավ ԲՀԿ-ական պատգամավորը: Նախարարն ասաց, որ իրենք պատասխանատու են այն ծրագրերի համար եւ խոսում են այն ծրագրերի մասին, որոնք կատարել է գյուղնախարարությունը եւ որոնք իր ենթակայության տակ են:
Լյովա Խաչատրյանն էլ վրդովվեց. «Իֆադը»-ը իրանը չի, էս իրանը չի, մյուսն իրանը չի, միայն ինտուզիազմով, բարի ցանկությամբ բավական չէ գյուղատնտեսությունը զարգացնելու համար: Շարունակ շփվում ենք այն խնդրի հետ, որ ստեղ չկրակեցին, որովհետեւ զապռավկա արած չէր, չսրսկեցին, չգիտեմ ինչ եղած չէր: Եթե դուք եք ղեկավարում գյուղատնտեսությունը, ինչն է պատճառը, ինչ է` ՕԵԿ-ին այդքան քվոտա չի՞ հասնում, որ բյուջեից փող տան»: Պատգամավորը հետաքրքրվեց` նախարարը չի՞ կարծում, որ գյուղատնտեսությունը կառավարելու համար պետք է ամբողջական լիազորություն: Նախարարն ի պատասխան ԲՀԿ-ական պատգամավորի դժգոհությունների ընդամենը հակադարձեց. «Հա որ «Իֆադն»-ն իմը չի, ասե՞մ իմն ա»: Լյովա Խաչատրյանն ուղիղ հարցը ձեւակերպեց`ձեզ բավարարո՞ւմ է ձեր լիազորությունները: «էսօր ինչ որ կա իմ համար բավարար ա, ես էսօր էղածով կառավարում եմ»,-հայտարարեց նախարարը:
ԲՀԿ-ական պատգամավորներին մնում էր զարմացած դեմքով նայել միմյանց ու ուսերը թոթվել:
Նելլի ԳՐԻԳՈՐՅԱՆ
