Կողբ էին ժամանել 70 զբոսաշրջիկ-մարզիկներ:
Շուրջ 70 զբոսաշրջիկներ Նորվեգիայից, Դանիայից, Ֆինլանդիայից, Լատվիայից, Էստոնիայից, Շվեյցարիայից եւ Ռուսաստանից ժամանել էին Տավուշի մարզի սահմանամերձ Կողբ գյուղից 10 կմ հեռավորությամբ գտնվող անտառային ուսուցման «Զիկատար» կենտրոն:
Կարդացեք նաև
Նրանց այստեղ ողջունեցին եւ հունիսի 5-ի՝ բնապահպանի միջազգային օրվա կապակցությամբ շնորհավորեցին «Զիկատար» ուսումնական կենտրոնի տնօրեն Անդրանիկ Ղուլիջանյանը եւ Կողբի գյուղապետ Արամայիս Աբովյանը: Հյուրերը ծառեր տնկեցին «Զիկատար» կենտրոնի այգում, ծանոթացան Կողբի գեղարվեստի դպրոցի դասատուների եւ սաների նկարներին ու ձեռագործ աշխատանքներին: Այնուհետեւ զբոսաշրջիկները, որոնց մեծամասնությունը 60-80 տարեկան է, «Զիկատարում» մասնակցեցին տեղանքում սպորտային կողմնորոշման մրցույթի: Նրանք անտառում տեղադրված նշաններով կողմնորոշվելով, վազելով հաղթահարեցին մրցատարածքը՝ մոտ 3 կմ անտառային ճանապարհ: Վերջում թոշակառու մարզիկներին հայկական ճաշկերույթ տրվեց: Արտասահմանցիներն այնքան էին տպավորված «Զիկատար» կենտրոնի կուսական բնությամբ, հյուրասիրությամբ, որ նախատեսվածից մի քանի ժամ ավելի մնացին այնտեղ:
Ոսկան ՍԱՐԳՍՅԱՆ
