«Մեղադրանքը ծանրագույն մեղադրանք է: Այս պահին ես չեմ ուզում դիլետանտ լինել և գնահատել, դա ուսումնասիրության շատ լուրջ թեմա է և պետք է սպասել դատախազության պարզաբանմանը: Օֆշորային գոտում գրանցված կազմակերպությունները ստվերային տնտեսության հիմնական բջիջներն են, և եթե Հայաստանի որևէ պաշտոնատար անձ մասնակցում է այդ գործընթացին, ուրեմն նա ստվերային բջջի մեջ է»,- խորհրդարանում լրագրողների հարցին ի պատասխան ասաց, ՀՅԴ-ական պատգամավոր Արծվիկ Մինասյանը`հավելելով, որ վարչապետի օֆշորային ընկերության խնդիրը լուրջ հարց է և մի քանի հրապարակումների միջոցով հնարավոր չէ վերջնական եզրահանգման գալ:
Մինասյանի կարծիքով, այնուամենայնիվ, մի բան ակնհայտ է` օֆշորային կազմակերպությունը կա, խոշոր բաժնետերը չի հերքել իր գոյությունը, նա պարզապես փորձում է մեղադրանքը տեղափոխել վարչապետի եւ սրբազան Կճոյանի վրայից անհասկանալի ուղղությամբ:
ԱԺ պատգամավորը գտնում է, որ խնդիրը կոծկելու փորձեր կարվեն, բայց դրանից, վնասվելու է պետությունը. «Ի վերջո, մարդիկ դատաստանի առաջ են կանգնելու, և եթե այսօրվա պաշտոնատար անձինք այդքանը չեն գիտակցում, խորհուրդ կտամ վերցնեն և պատմության դասագրքերն ուսումնասիրեն: Բոլոր զեղծարարությունները բացահայտվելու են, ուստի կոծկելը շատ ավելի վատ հետևանքների կարող է բերել»:
Նելլի ԳՐԻԳՈՐՅԱՆ
