«ՀԱԿ-ում առանձնակի շարժ չկա»,-Aravot.am-ի հարցին, թե ընտրություններից հետո հայտարարվում էր, որ ՀԱԿ դաշինքը պահպանելու առումով նոր զարգացումներ են սպասվում, հիմա կա՞ն այդ զարգացումները, թե՞ շարժ չկա, այսպես պատասխանեց «Քրիստոնեա-ժողովրդական վերածնունդ» կուսակցության նախագահ Սոս Գիմիշյանը: Անդրադառնալով շարժի բացակայության պատճառներին` նա նշեց. «Պատճառը մնացած անդամների պասիվությունն է, ոչ բոլորն են ուզում ակտիվ աշխատել, նաև փաստ է այն, որ գնացածներից դեռ ոչ ոք չի վերադարձել»:
Հետաքրքրվեցինք` ՀԱԿ կուսակցության ստեղծումը այդ հարցում դերակատարություն ունի՞: Ս. Գիմիշյանը պատասխանեց. «ՀԱԿ կուսակցության ստեղծումը և ՀՀՇ-ի գնալը կարող էր առողջացման հիմք հանդիսանալ, բայց դա էլ տեղի չի ունեցել: Իսկ այն փաստին, որ նոր ՀՀՇ-ն են ուզում ստեղծել, նորմալ եմ վերաբերվում: Դա մարդկանց սահմանադրական իրավունքն է, ՀՀՇ-ն ավանդական կուսակցություն է, ուզում են վերականգնել, կարևորը առողջ հիմքի վրա լինի, իսկապես իր գործունեությամբ օգնի երկրին ու ժողովրդին»:
ՀԱԿ դաշինքի նախկին անդամները տարբեր առիթներով նշել են, թե ՀԱԿ-ի ներսում շատ բան անդամներից գաղտնի էր պահվում: Ս. Գիմիշյանից հետաքրքրվեցինք` դա այդպե՞ս էր: Նա արձագանքեց. «Դրանում կա ճշմարտություն: Հիմնական խնդիրները նաև դրանից են բխում»:
Տաթև ՀԱՐՈՒԹՅՈՒՆՅԱՆ
