Սա Իջեւանում նույն հոդվածով ՀԿ տնօրենի դեմ հարուցված 2-րդ գործն է
Իրավապահ համակարգից ստացված մեր տեղեկություններով՝ Տավուշի մարզի դատախազությունը ՀՀ քրեական օրենսգրքի 179 հոդվածի 2-րդ մասի 1-ին կետով(«Յուրացնելը կամ վատնելը, որը կատարվել է պաշտոնական դիրքն օգտագործելով») քրեական գործ է հարուցել Իջեւանի «Երիտասարդ Տավուշ» ՀԿ տնօրեն Մ.Մ.-ի նկատմամբ: Վերջինս երիտասարդ կին է: Նախկինում ոստիկանության Տավուշի քննչական բաժինը որոշել է մերժել այս գործով նախապատրաստված նյութերով քրեական գործի հարուցումը: Տավուշի մարզի դատախազությունը վերացրել է այդ որոշումը: Մեր տեղեկություններով՝ քրեական գործը հարուցվել է 800 հազար դրամ յուրացնելու համար: Զբաղվածության տարածքային կենտրոնի միջոցով հաշմանդամն աշխատանքի է տեղավորվել «Երիտասարդ» Տավուշ» ՀԿ-ում, նրա աշխատավարձի մի մասը պետք է վճարեր պետական բյուջեն՝ մյուս մասը՝ ՀԿ-ն: Մեր տվյալներով՝ հաշմանդամ գործազուրկը չի ստացել պետբյուջեից իրեն հասանելիք գումարը եւ ՀԿ-ից հասանելիք աշխատավարձը: Նշենք, որ 2013թ. ապրիլին նույն՝ 179 հոդվածի 2-րդ մասի 1-ին կետով քրեական գործ է հարուցվել Իջեւանի մեկ այլ ՀԿ-ի՝ «Բայրամյան» սոցիալական, բարեգործական ՀԿ տնօրեն Արսեն Բայրամյանի նկատմամբ, ով մեղադրվում է «Վորլդ վիժն» կազմակերպությունից ստացված գույքը յուրացնելու մեջ:
Ոսկան ՍԱՐԳՍՅԱՆ
2014թ. ապրիլի 28-ին որոշում է կայացվել քրեական գործի վարույթը կարճել հանցագործության դեպքի պատճառով, ինչը նշանակում է, որ որևէ յուրացում չի կատարվել: