Այսօր «Հայացք» ակումբում «Շուշի 92» ազատամարտիկների եւ վետերանների միության խորհրդի անդամներ Սարգիս Զաքարյանը եւ Հակոբ Հակոբյանը անդրադարձան ազատամարտիկների խնդրին, հայտնելով, որ վաղը կրկին հավաքվելու են Կառավարության շենքի մոտ:
Հակոբ Հակոբյանի խոսքով` Հայաստանում արցախյան սինդրոմ է, ավելի ճիշտ` այն, ինչ կատարվում է ազատամարտիկների հետ, նա դա անվանում է հայկական սինդրոմ:
Հակոբյանի խոսքով, կուսակցությունները պարզապես թքած ունեն իրենց խնդիրների վրա, շատերը մտածում են, որ կռվելն ազատամարտիկների պարտքն է եղել, սակայն` «ԱԺ-ում հատուկ օրենք պետք է ընդունվի ազատամարտիկների համար:
Թող որեւէ պատգամավոր չասի, թե ինչից ենք մենք օգտվում, ինչպես որ գրված է փաստաթղթերում, մենք ոչնչից չենք օգտվում: Լկտիությունն այն աստիճան է հասել, որ մեր հաղթանակներն իրենց են վերագրում: Եթե մենք այն ժամանակ պարտավորված զգացինք այս ազգի համար կանգնել, ուրեմն այսօր պատգամավորները, այդ բորբոսնած ուղեղները պարտավոր են մեզ, նրանց պետք է սրսկել ու հասկացնել, որ եթե դուք այսօր թլպատված չեք, ալլահ չեք կանչում, մեզ եք պարտական»:
Կարդացեք նաև
Հակոբյանի խոսքով` խնդրի լուծման հետ կապված է մեր ազգի նոր սերունդի դաստիարակությունը: Երկրում ազգային մտածելակերպ պետք է զարգացնել, ինչն էլ այսօր գոյություն չունի:
Սարգիս Զաքարյանն էլ գտնում է, որ միշտ էլ այդպես է եղել, պատերազմը տարել է զինվորը, պարգեւատրվել են գեներալները. «Այսպիսի վիրավորանքը հարիր չէ մեզ: Մենք տարիներ շարունակ լռել ենք, բայց արդեն համբերության բաժակը լցվել է: Կոչ եմ անում բոլոր ազատամարտիկներին միանալ մեզ, անկախ նրանից, թե ով, որ ջոկատում է եղել, այս պայքարը բոլորիս համար է, այստեղ քաղաքական ինտրիգներ գոյություն չունեն»:
Ազատամարտիկները հայտնեցին, որ իրենք հետեւողական ենք լինելու, կոչ արեցին բոլորին միանալ իրենց ու չվախենալ` «Մենք մեր վախը թողել ենք կռվի դաշտում…»:
Եվա ՀԱԿՈԲՅԱՆ
Կեցցեք,մենք ձեզ հետ ենք եղբայրներ…
Ձեր գործն արդար էր և պահանջն է այսօր արդար…