Aravot.am-ը մայիսի 22-ին հրապարակել էր ԱԳՆ պաշտոնական հաղորդագրությունը: Այսօր ստացել ենք Գյումրի ծննդատան պաշտոնական պատասխանը այդ հրապարակմանը, որով մեզ է վերագրվել այդ հաղորդագրությունը, եւ պահանջ կա հերքում տպագրել «ինչ-որ ոչ մաքուր նպատակներ հետապնդող հոդվածի վերաբերյալ»: Ահավասիկ:
Հարգելի խմբագրություն
«Առավոտ» թերթի ինտերնետային տարբերակում տպագրվել էր հոդված` «Գյումրու Ավստրիական մանկական հիվանդանոցի ավելի քան 20-ամյա գործունեության ամփոփմանը նվիրված միջոցառում Վիեննայում» վերնագրով: Հոդվածում տեղ է գտել այսպիսի թյուր տեղեկատվություն, որ Ավստրիական մանկական հիվանդանոցի վերապրոֆիլավորման արդյունքում սկսել է գործել ծննդօգնության և գինեկոլոգիայի բաժանմունք: Գյումրու ծննդատունը տեղափոխվել է Ավստրիական մանկական հիվանդանոց, հաստատությունն էլ վերանվանվել է Մոր և մանկան հիվանդանոց:
Պետք է նշել, որ 70 տարվա պատմություն ունեցող Գյումրու ծննդատունը, որը կայացած ավանդույթներով հարուստ, հանրապետությունում ճանաչում ունեցող, մարզերում միակ երկրորդ մակարդակի ծննդօգնության հաստատատությունն է, չի կարող տեղափոխվել ինչ-որ մի հիվանդանոցում բացված մանկաբարձա-գինեկոլոգիական բաժանմունք, որը դեռևս լիիրավ ծննդօգնության բուժհաստատություն դառնալու համար առնվազն պետք է անցնի տարիների պատմություն և բռնի քննություն՝ իր չափազանց կարևոր և պատասխանատու գործում:
Կարդացեք նաև
Խնդրում ենք Ձեզ, մեր բողոքը ընդունել հիմք և թերթում տալ հերքում, այս, ինչ-որ ոչ մաքուր նպատակներ հետապնդող հոդվածի վերաբերյալ:
Հոդվածը քննարկվել է Գյումրու ծննդատան ընդհանուր ժողովում:
«Գյումրու ծննդատուն» ՓԲԸ–ի գործադիր տնօրենի ժ/պ` Ե. Խաչատրյան
