Պարզվում է` Քաջարանի պղնձամոլիբդենային կոմբինատի տնօրեն Մաքսիմ Հակոբյանն է ԼՂՀ նախագահ Բակո Սահակյանին, մարզպետ Սուրեն Խաչատրյանին, Գորիսի քաղաքապետի նախկին թեկնածու, սպանված Ավո Բուդաղյանին և մյուսներին հրավիրել Սդղի լիճ` հացկերույթի, որից ժամեր անց էլ մարզպետի տան մոտ տեղի է ունեցել արյունոտ միջադեպը: Նշենք, որ Սյունիքի մարզպետ Սուրեն Խաչատրյանի տան մոտ հունիսի 2-ի գիշերը հնչել էին կրակոցներ, ինչի արդյունքում սպանվել էր Գորիսի քաղաքապետի նախկին թեկնածուն՝ Ավետիս Բուդաղյանը, իսկ նրա եղբայրն ու մարզպետի թիկնապահը հիվանդանոցում են: Նաև` այժմ թափուր է Սյունիքի մարզպետի պաշտոնը: Երեկ այս հարցերի շուրջ զրուցեցինք Մաքսիմ Հակոբյանի հետ:
– Պարոն Հակոբյան, փաստորեն, Դուք էլ ե՞ք մասնակցել խնջույքին, որտեղ եղել է նաև Բակո Սահակյանը, Սյունիքի մարզպետ Սուրեն Խաչատրյանն ու սպանված Ավետիս Բուդաղյանը:
– Բակո Սահակյանը եկել էր Քաջարանի կոմբինատը նայելու:
– Ասել է թե` Ձեր հյո՞ւրն է եղել:
Կարդացեք նաև
– Այո՛, եկել էր կոմբինատը նայելու, իրանց մոտ էլ կան հանքեր, եկել էր զուտ մանրամասն նայելու: Վերջում էլ ցանկացավ Տաթևով գնալ, ճանապարհին մի կտոր բան ենք կերել, խնջույք չի եղել: Բայց քեֆ չի եղել, սովորական մի կտոր հաց ենք կերել:
– Ասվում է, որ էնդեղ վեճ է եղել:
– Այդպիսի բան չի եղել: Զրույցն ամբողջությամբ եղել է ձեռնարկությունների մասին: Չի եղել էդպիսի բան:
– Իսկ ի՞նչ է եղել` կասե՞ք:
– Ոչ մի բան, ասում եմ` ոչ մի բան չի եղել: Մի կտոր հաց ենք կերել, ճանապարհել, բարի ճանապարհ ասել, եկել:
– Ոչնչից հնարավո՞ր է սպանություն լիներ:
– Դրանից հետո ես ի՞նչ իմանամ, մենք շատ շուտ ենք գնացել: Դեպքից մոտ 6 ժամ առաջ ես եկել եմ Քաջարան, Բակո Սահակյանն էլ գնացել ա Ղարաբաղ:
– Դուք ճանաչում էի՞ք սպանված Ավետիս Բուդաղյանին, Ձեր կարծիքով` մահացածը և նրա եղբայրը ի՞նչ կարգի մարդիկ էին:
– Այո՛, ճանաչում էի, նորմալ մարդիկ են, հայտնի մարդիկ, լավ ընտանիքի զավակներ:
– Այդ դեպքում թշնամանքը ինչի՞ արդյունք էր:
– Չեմ կարող ասել: Ինչքան որ էդ սեղանի շուրջ մենք միասին սիրով իրար հետ նստած էինք, ոչ մի նման խոսակցություն չի եղել: Բացարձակապես ոչ մեկը ոչ մեկին մի փոքր անգամ նեղացնող մի բան չի օգտագործել: Դրանից հետո թե ինչ ա եղել` դա ես չեմ կարա ասեմ:
Մարինե ԽԱՌԱՏՅԱՆ
Հոդվածն ամբողջությամբ կարող եք կարդալ «Ժամանակ» թերթի այսօրվա համարում
